Ji bo şermezarkirina êrişên dewleta tirkî ya dagîrker, bi durişma “Emê bi pênûsên xwe şerê terorê bikin û dagîrkeriyê têk bibin” bi hezaran mamoste û xwendekarên Minbic û gundewarê wê xwepêşandaneke girseyî li dar xistin.
Xwepêşandana ji aliyê Komîteya Fêrkirin û Perwerdeyê ve hatî birêxistinkirin, ji çerxerêya Mîzan ya rojavayê bajêr dest pê kir û heta Yarîgeha Beledî ya li navenda bajêr dewam kir. Xwepêşandêran durişmên silavkirina berxwedana şervanên QSD`ê û berxwedana şêniyên Eyn Îsa yên li hemberî êrişên dagîrkeran, avêtin.
Li yarîgehê, hevserokê Rêveberiya Giştî ya Dibistanan Hesen El-Ebdullah wiha axivî: “Em bi zanabûn, têgihîştin û îradeya xurt xwe bi çek dikin da ku em ji hêzên terorîst re bêjin ku em ji Rêveberiya Xweser û rêbazên wê yên rêvebirina kar û barên perwerdeyê, aborî û civakî razî ne. Baweriya me bi jiyana hevbeş heye, çimkî em di aramî û ewleyiyê de dijîn.”
Hevserokê Yekîtiya Mamosteyan Qeys Ebade jî diyar kir ku êriş û zêdegaviyên domdar yên dewleta tirkî ya dagîrker û çeteyên wê li ser navçeya Eyn Îsayê hene û got, ev êriş nîşan didin ku aramiya li herêmê li xweşê dewleta tirkî ya dagîrker nayê û naxwaze şerê li Sûriyê bi dawî bibe.
Mamoste Emîne Ehmed jî bi navê mamosteyan wiha axivî: “Em îro li vir in, em diyar dikin ku em dagîrkeran û kiryarên wan yên dermirovî red dikin. Dewleta tirkî û çeteyên wê hewl didin senaryoya Efrîn, Serê Kaniyê û Girê Spî û roxandin û kuştinê, careke din pêk bînin.”
