QSD’ê bi daxuyaniyekê têkildarî êrişên dawî yên artêşa tirkî ya dagîrker û çeteyên wê yên li dijî Eyn Îsay agahî dan û diyar kir ku di dema bersiva êrişan de 5 şervanên wan şehîd bûne.
Navenda Ragihandin û Çapemeniyê ya QSD’ê têkildarî êrişên dawî yên artêşa tirkî ya dagîrker û çeteyên wê yên li dijî Eyn Îsayê daxuyaniyek da.
QSD’ê diyar kir ku artêşa tirkî ya dagîrker û çeteyên wê di demên dawî de li xeta Eyn Îsa êrişên xwe zêde kirine û bi wan êrişan dixwaze li derdora riya M4 hakimiyetê çêkin û ji wir êrişê navçeya Eyn Îsa bikin û wiha da zanîn: “Gelek hewldanên çeteyan di encama bersiva şervanên me de bê encam man û çete neçar man ku paş ve bikişin.”
Navenda Ragihandin û Çapemeniyê ya QSD’ê diyar kir ku roja 27’ê Kanûnê çeteyan li hemberî gundê Mişêrfa û Cehbel bi desteka balafirên bêmirov êrişeke berfireh kirin, di vê êrişê de derdora Eyn Îsa û gundewarê wê bi dijwarî hatin topbarankirin û wiha lê zêde kir: “Di encama bersivdayîna şervanên me de, roja 27 û 28’ê Kanûnê li xeta gundê Mişêrfa û Cehbel cih bi cih pêvçûn qewimîn û êrişên dagîrkeran careke din hatin şkandin.
5 ŞERVAN ŞEHÎD BÛN
Di wan pêvçûnan de 4 ji wan endamên Lîwa El-Şimal El-Demokrat, bi giştî 5 hevriyên me şehîd bûn. Em ji malbatên şehîdên xwe û ji gelê xwe re sersaxiyê dixwazin û soza parastina welatê xwe dubare dikin.”
