Ahmet AKTAŞ
Desthilatdariya Receb û Bahçeli, weke erdhejê dilerize. Hilweşandina faşîzma wan nêzîk dibe. Ji bo xwe li ser piya ragirin û temenê xwe dirêj bikin, çavê wan li hinek lîstokan e.
Lê ji bo him li hundur û him li derve bi tevayî temenê xwe dirêj bikin, bi taybetî li dijî tevgêra kurdan, bi lezgînî ketine nava hewldanan.
Li gor agahiyên çapemeniyê û hinek şîrovegeran, ew heyeta leşkerî ya Rûsyayê ya ku di 13-14 Mijdarê de hatibû Tirikiyê û li gel şanda leşkeriya tirkan rûniştin, ne bi tenê ji bo pirsgrêkên Qerebaxê, bi piranî li ser Idlib û Rojava axivîne û gûmana xurt heye ku li ser hinek planên qirej li hev kirine. Ji ber ku li ser van danstandinên wan ên du rojan, ti daxwiyanî nedan çapemeniyê.
Li gor saloxan, hema piştî hevdîtinan, bi lez nûnerên şanda Rûsî çûye Şamê û li ser vê çûnê jî ti daxwiyanî nehatiye dayîn. Belê piştî van hevdîtinan û geryanan, liv û tevgêrek ber bi çav, him li Idlibê û him li Rojavayê bi giştî despê kiriye.
Li aliyê din liv û tevgêra bi heman şêweyî û paralelî vêna li Başûr heye. Ji xwe li ser Peymana Şingalê gelek şîrove hatin kirin. Wisa tê xuyakirin ku li goreyî wê peymanê, di bin koordînasyona Receb de, desthilatdarên Bexda û Hewlêrê kar li hev par kirine û ketine ser rêya fermana qirkirinê!
Weke tê zanîn ev biryara vê peyman û fermanê berî hilbijartinên DYA bi îmzeya Jeffreyy hatibû dayîn. Lê di wan rojên germaya hilbijartinan de û bi diyarbûna serkeftina Biden re hinek sar bûbû. Belê ev nêzî deh rojan e, liv û tevgêr ji berê jî germtir bûye. Ya balkêş jî ev e!
Ji bo vêna jî, tê gotin ku Receb, dixwaze ji vê valatiya ku hêj Trump desthilatî radestî Biden nekiriye, bi lezgîn hinek êrîşan bibe ser Şingalê, Mexmûrê, Herêmên Parastina Medya, Rojava, Idlib û hwd! Ji xwe êrîşên li Bakur her bê navber dewam dike. Bêgûman li vira piştgriyê ji Putîn jî distîne.
Jixwe desthilatdariya Receb hemû li ser derew, lîstok û provakasyonên qirêj hatiya avakirin û lewma ti lome jê nayê kirin.
Bi tenê lome û daxwaz ji hevalbend û hevkarên wî yên Kurdistanî heye. Her wiha divê yên xwe welatparêz û dilsozê azadî û aştî û demokrasiyê dibînîn jî, xwe li hêviya rahma ti hêzên biyanî ranegrin, her baweriya me bi gel û tevgêra me be.
