Ahmet Aktaş
Di serî de ez vê roja dîrokî û pêngava yekemîn a Şoreşa Rojava li gelê Kurdistanê û yê herêmê hemûyan pîroz dikim.
Di vê mehê de gelek bûyer û çalakiyên xemgîn û şahî hene.
Hema hinekan ji wan rêz bikim û bêjim; komkujiya Geliyê Zîlan, Komploya li ser Dr.Kasimlo û hevalên wî, şehadeta Helmet (Diyar Xerib) û hwd.
Çalakî û berxwedana 14 ê Tîrmehê ya Zîndana Amedê, min di nivîsa xwe ya hefteya din de şîrove kiribû.
Bê gûman ew êrîşên xedar ên neyarên me Kurdan, ew komkujiyên wan ên li ser gelê me, ne hema ji rêzê û kêfîne, na xêr, ji tirs û lawaziya wan tê.
Ji ber ku gelê me, weke wê gotina dîrokî, “ji xweliya agirê xwe dîsa radibin û berxwe dide”! E ha hêz û dewletên kedxwar û xwînxwar ji vê berxwedana mirovahiyê û azadiyê ditirsin.
Weke tê zanin, vê carê, pêşeng û karwanê şoreşê, pişta xwe spart wan berxwedanên dîrokî û hemdemî hemûyan û bi şîara “Berxwedan Jiyane” despêkirin û meşiyan.
Vî karwanê pêşeng û hemdem, ew ruhê 21 ê Adarê, 18 ê Gulanê, 14 ê Tirmehê û 15 ê Tebaxê, gihandin 19 ê Tîrmehê û li KOBANA navdar, bi ŞOREŞA ROJAVA taçîdar kirin!
Ev pêngav li vê qonaxê ranewestiya, karwan meşiya û li pey hev li EFRÎNA birîndar û li hemû Cezîra Rojaava, çirûskên agirê şoreşê geş kirin û her dever rohnî û dilxweş kirin.
Agirê vê ŞOREŞê, saet bi saet, roj bi roj, meh bi meh, sal bi sal gûr û geş bû.
Her wiha dibû hêvî û bawerî ji bo hemû gelên belengaz ên herêmê. Pêla germaya vê şoreşê, li herêmê jî ranewestiya, deng û rengê xwe gihand cihanê jî. Ev ruhê berxwedêr û xweser, weke mînaka ciwayê, li cihekî na sekine her diherike û ji xwe re rê çêdike û dimeşe.
Va mînaka ciwayê, Rêber APO, ji bo vê Tevgêrê digot. Belê biwêjek wî din jî hebû, digot: “Tevgêra me weke ‘hespikê hesinî’ye, eger raweste dikeve erdê, divê qet raneweste, her bi pêşve biçe”
Ez bawer dikim ev gotina wî ya duyemîn, ji bo vê qonaxa şoreşê gelek giring û watedar e.
Ji ber ku weke me hinek bahs kir, êdî ev ŞOREŞA ROJAVA, zû belev bû û xwedîderketandin zêde çêbû, êdî ev “Rêveberiya Xwesera Demokratîk” weke modelek jiyana nuh a civakî gelek hat pejirandin. Û ev pêşkevtina hêja û bi rûmet dewletên dagirker û hegemon gelek tirsand. Ji bo vê peşkeftinê bidin rawestandin an bişkînin, bi lez û bez êrîşên xedar ajotin ser; zulma ku li Efrînê, Serêkaniyê, Girespî û xetera li ser gelek deverên din jî li ber çava ye.
Lewma divê herkes li goreyî wê bivêja Rêberiyê tevbigere û bi heralî têbikoşe ji bo parastin, xurtkirin û pêşvexistina Şoreşa ROJAVA!
Ev, kar û xebat û peywir û erk ê me hemuya ne!
Ev Roj, ev Cejn, ev Jiyana Azad û ev Kar li me û mirovahiyê pîroz be!
