Li Afrîka ku vîrûsa koronayê vê gavê bandoreke giran lê nekiriye, tê payîn ku ji aliyê xwerek ve krîzeke mezin a însanî derkeve.
Vîrûsa Covîd-19 ku ji Çînê belavî cîhanê bû, hê di asteke kêm de li Afrîka belav bûye. Eger vîrûs mîna li deverên din li Efrîka belav bibe, sîstema tenduristiyê ya parzemînê wê di bin de bimîne. Vîrûsa Covîd-19 li seranserê cîhanê li gel tenduristiyê herwiha bandoreke giran li aboriyê kir. Tê gotin wê ev lawaziya aboriyê herî zêde bandorê li Afrîka bike.
Ji pisporên Bernameya Xwerek ya Cîhanê (WFP) a ser Neteweyên Yekbûyî (NY) Arif Hûsaîn berî çend rojan daxuyaniyek da û diyar kir, ku ji ber Covîd-19 di peydakirina berhemên çandiniyê de rewşeke giran heye.
Li gorî WFP’ê, ji ber karantînayên ji ber Covîd-19 dewlet û şexis hewl didin xwerek li gel xwe komî ser hev bikin. Ji ber wê dibe ku di hin berheman de xela çêbe. Eger ev rewş bidome û aborî lawaztir bibe, dibe ku welatên herî qels ji aliyê xwrek ve zor û zehmetiyên giran bikişînin.
Di rewşeke wisa de welatên herî zêde bikevin binê bandora vê krîzê wê welat berhemên çandiniyê ji derve dikirin bin.
Di nava wan welatên ku WFP ji bo wan alarmê dide Îran, Iraq ku bi firotina petrolê ve girêdayî ne û Sûriye û Yemen jî hene ku şerê navxweyî zerareke mezin daye wan.
