Meclisa Jinan a Bakur û Rojhilatê Sûriyê diyr kir ku tevî têkoşîna li dijî nexweşiyê jî artêşa Tirk a dagîrker qanûnên navneteweyî binpê dike û êrîşan didomîne.
Li Bakur û Rojhilatê Sûriyê tevî bangên navneteweyî yên agirbestê û girtina bergiriyên li dijî Koronavîrûsê (Covid-19) ku mirovayî xistiye xeterê, artêşa Tirk û çeteyên wê sûcên xwe didomînin.
Meclisa Jinan a Bakur û Rojhilatê Sûriyê bi daxuyaniyekê sûcên artêşa Tirk û çeteyên wê şermezar kirin. Jinan da zanîn ku tevî rewşa awarte ku cîhan ji ber belavbûna vîrûsê tê re debas dibe, têkoşîna li dijî belavbûna vîrûsê û parastina gelan ji windayiyan, artêşa Tirk û komên çeteyan ên ji Sûriyê hê jî êrîşî Bakur û Rojhilatê Sûriyê dikin.
Di nava çend rojên derbasbûyî de artêşa Tirk bi topan gundewarên derdora Eyn Îsa, herwiha gundewarên Minbicê topbaran kirin û zarokek şehîd bû. Bavê wê jî birîndar bû. Di encama topbarana li ser gundewarên Hesekê de 3 kes birîndar bûn.
Her wiha di encama topbarana li ser gundewarên bajarokê Til Temir, Zirgan û Um El-Kêf de serbazek hate kuştin û 4 leşkerên din jî li gundê Qebir El-Sexîr û El-Ebûş ên girêdayî navçeya Til Temirê, birîndar bûn.
