Tevgerên çandê TEV-ÇAND û Kevana Zêrîn Ewropa, endama Grûp Yorûm Hêlîn Bolek bîr anîn, ku di roja 288’an a rojiya mirinê de jiyana xwe ji dest dabû.
TEV-ÇAND û Kevana Zêrîn Ewropa daxuyaniyeke hevpar weşandin û wiha diyar kirin: “Ji ber şehadeta endama Grûp Yorûm Hêlîn Bolek em ji hevalên wê yên li nava komê, hunermendên şoreşger-demokrat, malbata wê û gelên Tirkiyeyê re sersaxiyê dixwazin. Xeta têkoşînê ya ku Hêlîn Bolek jê bawer dikir, bêguman wê hêzê bide têkoşîna şoreşgerî ya gelan û li qada rastiyê her bidome.”
Daxuyaniyê wiha dewam kir:
“Desthilatdariya faşîst a AKP-MHP’ê, di kiryarên li dijî mirovayiyê de yên li hemberî Kurdan û her derdorê êdî sînoran nas nake. Hunermend, rewşenbîr, her kesê mûxalif di hedefa faşîzma AKP-MHP’ê de ye. Desthilatdariya faşîst a ji huner û hunermendan, ji rastî û rojnamevanan ditirse, ji bo xwe li ser piyan bihêle êrîşî derdor dike.
Yên ku hunerê diafirînin her tim ji yên qanûnan çêdikin xurttir in. Li dijî vê hêza faşîst ku ji hêza hunerê ditirse û dixwaze hunermend bêdeng bibin, li gorî wan tevbigerin, emê bi tembûr, gotin, çepik, wêne, lîstikên xwe rawestin. Dema ku hêzên demokrat û şoreşger, hunermend li hev kom bûn û bi ser desthilatdariya faşîst ve çûn, wê têrker be.
Hêlîn Bolek ji bo bi rengekî azad bistirîne ket rojiya mirinê û di roja 288’an a berxwedana rojiya mirinê de jiyana xwe ji dest da. Bi navê hunermendên TEV-ÇAND û Kevana Zêrîn a Ewropa em careke din Hêlîn Bolek bîr tînin ku serî li ber faşîzmê netewand. Ji bo daxwaziya endamê Grûp Yorûm Îbrahîm Gokçek ê di rojiya mirinê de ye bê qebûlkirin, em bang li her kesî dikin ku dengê xwe bilind bikin.”
