Komîteya Şaredariyê û Parastina Derdorê ya Kantona Qamişlo ji bo pêşîgirtina li belavbûna Koronavîrûsê û xweparastinê, hemleyên hişyarkirinê li bajar, navçe û bajarokên kantonê didomîne û dema avêtina gelaş diyar kir.
Piştî ku Rêveberiya Xweser bi armanca parastina ji Koronavîrûsê (Covid-19) li Bakur û Rojhilatê Sûriyê qedexeya derketina derve ragihand, Komîteya Şaredariyê û Parastina Derdorê bi durişma “Emê çawa xwe û derdora xwe ji vegirtinê biparêzin?” dest bi hemleya hişyariyê kir.
Di çarçoveya hemleyê de karkeran pankart daliqandin û belavok li avayiyên giştî belav kirin. Herwiha diyar kirin ku divê xwediyên dikanan yên ne di nava qedexeya derketina derve de ne, pêdiviyên şêniyan peyda bikin.
Di belavokan de, ji bo xweparastina ji vîrûsa Koronayê, ev perespektîf dan; heta 20 saniyeyan destên xwe bi av û sabûnê bişûn, dermanên dezenfektekirinê bi kar bînin nexasim dema vegera ji derve, dûrî kombûnan û deverên qerebalix bikevin, cihên ku zêde destên xwe didinê wekî kompûter, mase, destikên deriyan, alavên xweşûştinê û telefonên malan û yên destan baş paqij bikin.
Herwiha perspektîfên têkildarî girîngiya dema avêtina gelaş dan û gotin divê ji 07:00`an heta 10:00`an bê avêtin û eger rewşeke awarte derket li jimarên tîma rewşên awarte bigerin.
