Piştî qedexeya derketina derve ya ji bo pêşîgirtina li derketina Koronavîrûsê (Covid-19), firoşkarên gerok li navçe, bajarok û taxên bajarê Qamişlo dixuyin.
Kolanên bajarê Qamişlo piştî qedexeya derketina derve hema hema vala ne. Tenê dengê firoşkarên gerok, bi taybetî firoşkarên sebze û fêkiyan tê bihîstin.
Di salên dawî de ji ber zêdebûna jimara sûkan ên ku piraniya pêdiviyên şêniyan peyda dikin, jimara firoşkarên gerok li navçe û bajarên herêma Cizîrê kêm bûbû. Heta ku mabû ev pîşe winda bibe. Lê bi qedexeya derketina derve re ev pîşe careke din vegeriya.
Piraniya firoşkaran berbanga sibehê şiyar dibin û diçin sûkên mezin da sebze û fêkî bikirin. Pişt re heta piştî nîvro di nava taxan de digerin.
Mihemed Subhî du sal in firoşkarekî gerok e. Mişteriyên wî di nava taxan de hene. Subhî diyar kir ku piştî qedexeya derketina derve jimara mişteriyên wî zêde bûye. Subhî debara xwe bi pîşeya xwe li ser erebeya xwe ya ku bi navê “tirêzîne” dike. Girêdayî karê xwe Subhî got, ez sebzeyan difiroşim. Armanca min ya yeke ew e ku pêdiviyên şêniyên taxan peyda bikim.”
Di kolanên Qamişlo de firoşkarên gerok
