Di vê demê de ku Koronavîrûs (Covid-19) gefeke li cîhanê ye, heta niha zanyaran ti derman jê re nedîtine. Herwiha ji bo pêşîgirtina li belavbûna wê NY’yê bang kir ku şer û nakokiyên li cîhanê giştî û Sûriyê bi taybetî da balê bikişînin ser xetera Koronavîrûsê, bisekinin.
Di vê derbarê de Nexweşxaneya Lêgerîn a navçeya Til Temirê ji bo pêşîgirtina li Koronavîrûsê tedbîrên pêwîst digire, lê artêşa Tirk a dagîrker gundên Serê Kaniyê û Til Temirê topbaran kirin, di encamê de sivîl birîndar bûn û hin welatiyan ji gundên xwe bar kir. Ji ber wê tedbîrên xweparastinê hatin astengdarkirin.
Têkildarî mijarê endama Rêxistina Heyva Sor a Kurdî a Nexweşxaneya Lêgerîn Cemîla Hemê ev agahî dan: “Halê hazir em li hemberî 2 cengan in, a yekê têkoşîna li dijî Koronavîrûsê ye û ya duduyan jî şerê li dijî êrîşên artêşa Tirk û çeteyên wê yên ser herêmê ye. Ji ber êrîşên artêşa Tirk sivîlan birîndar dikin û wan ji gundên wan koçber dikin, têkoşîna li dijî Koronavîrûsê wê zêdetir asteng bibe.”
Cemîla Hemê got; dewleta Tirk gundên Til Temirê topbaran dike, li milekî din jî bandora êrîşan li kehrebeya bajêr dibe. Ji ber wê em niha zehmetiyê dikişinin. Nexasim piştî girtina deriyê sînor, weke deriyê Til Koçber alîkariya welatiiyan nayê kirin.
Cemîla Hemê di dawiya axaftina xwe de bang li civaka navneteweyî kir ku zextê li artêşa Tirk bike da êrîşên xwe yên ser herêmên Bakur û Rojhilatê Sûriyê bisekinînin û bi vê pêşî li belavbûna Koronavîrûsê li herêmê bigirin û welatiyan jî ji xeterê biparêzin.
Endama rêveber a Nexweşxaneya Lêgerîn: Em li hemberî du şeran in
