Koordînasyona Kongreya Star rojbûna rêber Abdullah Ocalan pîroz kir û eşkere kir ku “Di şexsê serok Apo de em bûyîna mirovên azad, civaka azad, jina azad û zilamê azad di serî de rêber Apo, li dayîkan, jinan û gelan pîroz dikin.”
Koordînasyona Kongreya Star derbarê 4’ê Nîsanê rojbûna rêber Abdullah Ocalan de daxuyaniyeke nivîskî weşand. Di daxuyaniyê de wih hat gotin:
“Rojbûna serokê konfederalîzma demokratîk li tevayiya gelên cîhanê pîroz be! Rojbûna rêber Apo ku di heman demê de wek rojbûna jina azad û mirovên azad e, li tevayiya jinan jî pîroz be. Li ser erdnîgariya Rojhilata Navî gelek mînakên ku bi bûyîna xwe di jiyana mirovan û çandan de mîlad afirandîn, hene. Lê rêber Apo, bi wateya dayî jiyana xwe, civak û erdnîgariya lê hatî dinê, bûye yekbûna van mîladan tevan. Jixwe paradîgmaya şaristaniya demokratîk ku weke bûyîna xwe ya sisiyan bi nav dike, li hemberî krîzên kûr yên sedsala 21ê ku em pê re rûbirû dimînin, ji bo tevayiya mirovayiyê, gelan, jinan û bindestan ji bo bûyîneke nû û watedayîna hebûna xwe jî bingehekê diafirîne.
Ji ber wê di vê dema Koronavîrûsê de ku nêzî 3 mehan e cîhan tev pê re rûbi rû ye, watedayîna rojbûna rêber Apo girîng e. Rêber Apo berî vê bi salan, pergala kapîtalîst rexne kiribû û rexnedayîna hêzên demokratîk û şoreşger ku li hemberî vê pergalê altenatîf neafirandine, dabû.
Em jî ji bo seferberiyê bang li gelê xwe dikin ku di navbera 4 û 11´ê Nîsanê de felsefeya însanê azad, projeyên fikr û jiyana demokratîk par ve bikin û bînin ziman. Di serî de jin û ciwan kesên baweriya wan bi felsefeya rêber Apo heyÎ, bi her zimanî û li her dera lê ne, divê şaristaniya demokratîk ku felsefeya jiyan û bûyîna mirovayiya sedsala 21. e şîrovê bikin, bidin nasîn û belav bikin.
Di vê çarçoveyê de di şexsê serok Apo de em bûyîna mirovê azad, civaka azad, jina azad û zilamê azad di serî de li rêber Apo; li dayîkan, jinan û gelan pîroz dikin. Bi zanistiya ku her 4´ê Nîsanê bûyîna hêviyên mezin ji nû ve şîn dike, kesên ji bo cîhaneke azad, aram ku mirov bikare lê bijî, têdikoşin, bi rêzdarî silavên xwe li wan dikin.”
