Gerînendetiya Zimhêrê ya Kantona Kobanê bang li şêniyan kir ku giliyê xwediyên dikanan û bazirganên ku rewşa heyî bi kar tînin û bihayê pêwîstiyan bilind dikin, bikin.
Şêniyên kantona Kobanê ji ber bihayê zêde bi gilî û gazind in. Bi taybetî piştî qedexeya derketina derve di çarçoveya tedbîrên xweparastina ji vîrusa Korona de. Dikanên xwerek ji biryarê hatin îstîsnakirin.
Li gel ku şênî li malên xwe dimînin, daxwaziya xwerek zêde dibe. Xwerek li herêmê peyda dibe, lê biha ye. Li gorî bazirgan û xwediyên dikanan sedem daketina nirxê lîreyê Sûriyê li beramberî dolar e, ev jî pirsgirêkeke jiyanî ji şêniyên herêmê re çêdike.
Hevserokê Gerînendetiya Zimhêrê ya Kantona Kobanê Ehmed Daban got, me lîsteya bihayê xwerek derxist û li seranserê kantonê hatiye belavkirin.
Tevî qedexeya derketina derve endamên Gerînendetiya Zimhêrê rojane dewriyeyan di nav sûkan de dimeşînin, xwerekên demborî û bihayê wan kontrol dikin. Gerînendetiyê 5 dikan li bajêr di dema qedexeya derketina derve de muxalefe kirin.
Ehemd Daban bang li şêniyan kir ku bi gerînendetiyê re hevkar bin da biha kontrol bikin. Bi riya jimarên telefonê yên li ser şêniyan hatine belavkirin, giliyên xwe yên li dijî keysbazan bigihînin gerînendetiyê. Kesên derveyî lîsteyê bifiroşin, wê werin cezakirin.
