Solîn Mihemed / Qamişlo
Ji destpêka avakirina Zanîngeha Rojava û heya roja îro, xwendekar di nava pêşketineke domdar de ne; êdî her tiştî bi fikir û jêhatiya xwe diafirînin. Xwendekaran diyar kirin ku her projeyek ji bo wan gavavêtina ber bi pêşerojê ve ye.
Zanîngeha Rojava yek ji girîngtirîn navendên akademîk ên Rojava ye ku bi hezaran xwendekar lê perwerde bûne û derçûne. Di her beşekî zanîngehê de pêşketineke berçav heye û her xwendekarek bi hêz û hişê xwe tevdigere. Ji ber vê yekê, bi taybetî xwendekarên beşên zanistî di pêşketineke kûr re derbas diben û tiştên nû diafirînin.
Xwendekarên zanîngehê di nav çend mehan de projeyên cihêreng amade kirin. Ev projeyên ku di beşên zanistî de hatine çêkirin, di 29 û 30’ê Pûşperê de di pêşengeha zanîngehê de hatin nîşandan. Projeyên ku herî zêde bala serdêran kişandin robot û makineyên elektrîkî bûn. Li ser vê mijarê, xwendekarên beşên elektronîkê Mihemed Îsa û Solîn Hesen ji rojnameya me re axivîn.
‘Projeya me makineya elektrîkî bû’
Mihemed Îsa diyar kir ku projeya wî çêkirina makineyeke elektrîkî bû û wiha anî ziman: “Pirojeya me li ser makineya elektrîkî bû. Mebesta me ya bingehîn ew bû ku di vê serdemê de mazot û benzîn pir buha bûne, ji ber wê me xwest em amûreke elektrîkî biafirînin da ku her kes bikaribe bi hêsanî bimeşîne. Dema ku me ev çêdikir, em rûbirûyî gelek astengiyan bûn, ji ber ku parçeyên wê kêm bûn; tevî vê yekê jî me hemû parçe ji dukanên Qamişlo peyda kirin. Di pêvajoya çêkirinê de tenê em sê xwendekar û mamosteyek bûn, xebatê jî nêzîkî çar-pênc mehan ajot heya ku bi dawî bû. Hêviya me ew e ku aliyên peywendîdar di dabînkirina parçeyan de bibin alîkar, da ku em projeyên xwe berfireh bikin û di pêşerojê de tiştên hîn bikêrtir ji bo civakê biafirînin.”
‘Projeya me ji bo xizmeta civakê bû’
Solîn Hesen jî bal kişand ser girîngiya projeya xwe û wiha got: “Îro armanca me ya sereke ew e ku em tiştên weha çêbikin ku fêdeya wan ji civakê re hebe. Ji ber vê yekê me robotek çêkir da ku wekî alîkar xizmeta nexweşxane, xwaringeh û kesên temenmezin bike. Me du meh û nîvan li ser vê projeyê xebat kir, ji ber ku dîtina parçeyan pir zehmet bû. Ev robot hem bi pîlan dixebite û hem jî bi riya kontrolê tê birêvebirin. Ev ji bo me pêşketineke mezin e ku em îro dikarin ji bo civaka xwe tiştên bi fêde berhem bînin.”
