Hêvî Keleş/ Qamişlo
Di 26’ê Nîsanê de çalakvan û tevgerên jin ji bo piştgiriya YPJ’ê kampanyayek dan destpêkirin, ev kampanya bi armanca naskirina rola jinê di Sûriyê de û misogerkirina hebûna YPJ’ê di Wezareta Parastina Sûriyê de, hate destpêkirin û wiha got: “Heya ku armanca me pêk were wê ev kampanya berdewam bike.”
Kongreya Star di roja Yekşemê 26’ê Nîsanê de bi daxuyaniyekê kampanyayek ji bo piştgiriya Yekîneyên Parastina Jinan (YPJ’ê) da destpêkirin, di gavekê de ku armanca wê xurtkirina piştgiriya gel û saziyan ji bo rola van yekîneyan di parastina civakê û parastina mafên jinan di Sûriyê de ye. girêdayê vê mijarê endama Koordînasyona Kongira Star a Rojava Jiyan Hisên ji Rojnameya me re axivî.
‘Yekîneyên Parastina Jinan îradeya jinan û hêza civakê temsîl dikin’
Endama Koordanîsyona Kongira Star a Rojava Jiyan Hisên diyar kir ku “Ji dema ku şoreşa Rojava hate destpêkirina me gelek destkeftî bidest xistin yek ji wan Yekîniyên Parastina Jin bû, ku ew bi armanca parastina axê, bidestxistina mafê jina kurd û parastina hebûna wê di nava civakê de hate avakirin. Dema ku jinên kurd çav li YPJ’ê ketin û dîtin ku çawa xwe avakirin e û çawaniya birêxistina wan, ew îlhama xwe ji wan girtin ku êdî ew jî rola xwe di hundirê civakê de derxînin di hemî waran de çi ji aliyê siyasî, civakî, çandî û rêxistinî be. Yekîneyên Parastina Jinan (YPJ’ê) îradeya jinan û hêza civakê temsîl dikin, rola wan li gelek eniyan derketiyê pêş. Her hewldanek ji bo hedefgirtin an jî tehmîşa jinan û hêzên wan bi ser neketiye, tekez li ser berdewamiya vê têkoşînê kir û tekez kir ku YPJ’ê bûye modelek gerdûnî ya hêz û berxwedanê.
Şervanên jin ên di van yekîneyan de ji bo parastina civaka Sûriyeyê û tevahiya mirovahiyê bedelên giran dane. Wan di kampanyayên parastina bajar û gundan de û di rûbirûbûna terorîzma ku jinan ji her tiştî bêtir hedef digirt de, şehîd û birîndar dane. Rola van yekîneyan ne tenê bi aliyê leşkerî ve sînordar bûye, wan hêzek exlaqî û civakî jî ava kiriye ku beşdarî parastina jinan ji tundûtûjî û tundrewiyê bûye û nirxên beşdarbûn, wekhevî û edaletê ava kiriye. Hebûna Yekîneyên Parastina Jinan di nav artêşê de garantiya pabendbûna artêşê bi prensîbên xwe re di şiyana parastina aştî û ewlehiyê de ye. Herwiha, hebûna jinan di artêşê de ne tenê bi erkên parastinê ve sînordar e, lê têkoşîna ji bo guhertina zîhniyeta ku îrade û mafên jinan red dike jî di nav xwe de digire. Li ser vê yekê, parastina taybetmendiya van yekîneyan wekî hêzek jinan a pispor pêdivîyek neteweyî ye, ji ber ezmûna wan a dirêj di şerê li dijî terorîzmê, parastina jinan û beşdarbûna di parastina ewlehî û aramiyê de. Ev yek her wiha naskirina rol, dîrok û qurbaniyên wan misoger dike. Ji bo vê me kampanyayek bi dirûşmeya “Em hemû YPJ’ê ne, YPJ’ê hebûna me ye” dest pê kir ew armanc dike ku Yekîneyên Parastina Jinan (YPJ) di nav Wezareta Parastinê ya Sûriyeyê de bi fermî werin naskirin. Kampanya, ku di 26’ê Nîsanê de hatiye destpêkirin, rêzeçalakiyên giştî, semîner, mîtîng û meşan li gelek bajarên Rojava dihewîne.”
‘Kampanya rêzek berfireh ji çalakiyên ku armanc dikin rola YPJ’ê derxînin pêk tê’
Jiyan Hisên anî ziman ku armanca wan ji vê kampaniyê piştgiriya hêzên jin e û wiha pê de çû: “Em deyndarê keda şervanên YPJ’ê ne, ji destpêka şoreşa Rojava ve, ew bi parastina rûmet, xak û mafê jinê rabûne. Di heman demê de piştî hilweşîna Rêjîma Baas û hatina hikûmata demekî li şûna wan rewşa Sûriyê bi giştî hate guhrtin û derbasî qonaxeke nû bû, herwiha kurdên li Rojava jî di vê demê de di gelek şert û mercên zehmet re derbas bûn û ji şerên giran derketin. Û piştî lihevkirina 29’ê çileya 2026”an de a di navbera QSD’ ê û hikûmata demkî de peymana 29’ê Çileyê hat îmzekirin. Di peymanê de rastiya Hikûmetê hat dîtin, ku çawa ew xwedî hişmediyekê cîhadîst û mêra ye û hebûn û mafê jinê qebûl nakin, ji bo vê jî dema me zihniyeta wan dît ku çawa mafê jinê nadinê û bi taybet hêzên me yên Yekîniyê Parastina Jin tên paşguhkirin û hebûna wan nayên qebûl kirin, me weke rêxistin û tevgerên jin ên Rojavayê Sûriyê biryara detpêkirina kampaniyeke piştgiriyê kir.
Kampanya dengvedanek çêkir
Jiyan Hisên got ku Kampaniya ku me dabû destpêkirin ne tenê li ser asta Sûriyê an Rojavayê Kurdistanê, lê li her çar parçeyên Kurdistanê û tevahiya cîhanê belav bibe, herwiha piştî civîneke sazî û tevgerên jinên Rojava di 26’ê Nîsana 2026”an de ev kampaniya piştgiriya YPJ’ê bi dirûşmeya “Em hemû YPJ’ê ne, YPJ’ê hebûna me ye” me ragihand. Kampanya rêzek berfireh ji çalakî û bûyerên ku armanc dikin hişyarkirina rola Yekîneyên Parastina Jinan (YPJ) û berfirehkirina hevgirtina bi wan re hem li herêmê û hem jî li navneteweyî dihewîne. Di çarçoveya vê kampanyayê de, ji bo piştgiriya kampaniyayê, hem li hundir û hem jî li derveyî welêt konserên taybetî hatin organîzekirin, digel pêşangehên wêneyan ên ku ezmûn û rêwîtiyên şervanên jin belge dikin. Herwiha rêzeçalakiyên cuda ji meş, mitîng, komxebatan û çalakiyên hunerî jî tên li dar xistin. Li bajarên QamIşlo, Hesekê, Çil Axa, Til Temir û Zirgan, digel deverên din, gelek çalakî hatin lidarxistin ku jin û nûnerên rêxistinên sivîl û civakî beşdar bûn. Pankart û wêneyên şervanên jin ên Yekîneyên Parastina Jinan hatin bilindkirin ku, li gorî organîzatorên kampanyayê, girîngiya parastina rola ku yekîneyan di salên şerê li Sûriyeyê de lîstine tekez dikirin..”
Di dawiyê de, Endama Koordînasyona Kongira Star a Rojava Jiyan Hisên banga naskirina van yekîneyan û entegrekirina wan di pergala ewlehiyê ya Sûriyeyê de kir û îdia kir ku her hewldanek ji bo tehmîşa wan derxistina rola jinan e. Wê parastina berdewam a vê hebûnê û daxwaza mafên jinan di her çarçoveyek destûrî ya pêşerojê de piştrast kir, herwiha kampaniya wê jê jî berdewam bike.
