Lîloz Hisên/Qamişlo
Insyatîfa Sûriyê ya ji bo azadiya Rêber Abdullah Ocalan û Insyatîfa Parêzerên Sûriyê bo parastina Abdullah Ocalan, daxuyaniyek hevbeş derbarê mafê hêviyê ji bo Rêber Abdullah Ocalan û girtiyan dan û tekez kirin ku domandina tecrîda li ser Rêber Abdullah Ocalan hewldanên aştiyê têk dibe, deriyên çareseriya demokratîk û dadperwer a pirsgirêka Kurdî digire.
Insyatîva Sûriyê ya ji bo azadiya Rêber Abdullah Ocalan û Insyatîfa Parêzerên Sûriyeyê bo parastina Abdullah Ocalan, ji bo cihanîna Mafê Hêviyê jib o Rêber Apo daxuyniyekê hevbeş li ber avahiya Dada Civakî li bajarê Qamişlo dan.
Daxuyanî ji hêla Endama Insyatîva Sûriyê ya ji bo azadiya Rêber Abdullah Ocalan Şama Mihemed û Hevserokê nsyatîfa Parêzerên Sûriyeyê bo parastina Abdullah Ocalan Mihemed Emên Neîmî, bi zimanê kurdî û erebî hat xwendin.
Pergala tecrîdê qanûnên Ewropayê yên mafên mirovan binpê dike
Di despêka daxuyaniyê de wiha hat gotin: “Em dixwazin bi bîr bînin ku Dadgeha Mafên Mirovan a Ewropayê ji sala 2014’an ve daxwaz ji dewleta Tirkiyê kiriye ku guhertinên qanûnî pêk bîne û rêzê li vî mafî bigire. Dadgehê diyar kiribû ku pergala tecrîdê ya li dijî Rêber Abdullah Ocalan, pîvan û qanûnên Ewropayê yên mafên mirovan binpêdike. Komîteya Wezîran a Encûmena Ewropayê daxwaz ji desthilatdariya Tirkiyê kiribû ku qanûnên xwe li gorî van biryaran biguherîne û ji bo bicihanîna vệ erka qanûnî demeke diyar dabûyê. Piştî ku dema yekem bêyî tu gaveke berbiçav bidawî bû, demeke din a heşt mehan hat dayîn.”
Tevî astengiyên tecrîdê Rêber Apo çareseriyan pêşkêş dike
Di berdewamiya daxuyaniyê de wiha hat gotin: “Niha em nêzîkî dawiya vê demê dibin, lê hîn jî tu gaveke rasteqîn an guhertineke qanûnî nehatiye avêtin. Di 9,10 û 11’ê vê mehê de Komîteya Wezîran dê bicive da ku asta pabendbûna dewleta Tirkiyê ji bo bicihanîna van biryaran binirxîne û guftûgo bike. Rêber Abdullah Ocalan, di nav 27 salên girtina xwe ya li girava Îmraliyê de, tevî hemû astengî û şert û mercên giran ên tecrîdê, bi berdewamî peyam û hewldanên ji bo aştî û çareseriya demokratîk a pirsgerêka Kurdî pêşkêş kirine.”
Domandina Tecrîdê deriyên çareseriyê digre
Daxuyanî wiha hat qedandin: “Di serdemekê de ku şer, pevçûn û tundûtujî li herêmê her ku diçe zêde dibin, helwest û pêşniyarên wî yên ji bo gelan û pêşeroja herêmê, nîşaneya aqilmendî û berpirsiyariyek bilind e. Em di wê baweriyê de ne ku bicihanîna biryarên Dadgeha Mafên Mirovan a Ewropayê û Komîteya Wezîran, tenê wekî erkeke qanûnî ya dewleta Tirkiyê namîne; ew di heman demê de ezmûnek e ji bo rêzgirtina li mafên mirovan, serweriya qanûnê û pîvanên Ewropayê. Domandina vê tecrîda li ser Rêber Abdullah Ocalan, qeyrana siyasî kûrtir dike, hewldanên aştî û aramiyê têk dibe û deriyên çareseriya demokratîk û dadperwer a pirsgirêka kurdî digire. Li ser vê bingehê, em daxwaz ji Komîteya Wezîran a Encûmena Ewropayê, saziyên Yekîtiya Ewropayê û hemû rêxistinên navneteweyî yên mafên mirovan dikin ku zextê li dewleta Tirkiyê bikin da ku biryarên têkildarî “mafê hêvî” bixe meriyetê, rêzê li pîvanên navneteweyî yên mafên mirovan bigire û ji bo azadkirina hemû girtiyên ku ev maf wan dihewîne gavan bavêje. Ev yek ji bo afirandina mercên pêwîst ên çareseriya dadperwer û demokratîk a pirsgirêka Kurdî girtîgirekî sereke ye.”
