Hêvî Keleş/ Qamişlo
Merasîma oxirkirina siyasetmedar û endamê Konseya Serokatiyê ya Partiya Yekîtiya Demokratîk, şehîd Salih Muslim, bi beşdariya girseyeke mezin ji xelkê Cezîrê, şandeyên ji Kobanê û herêmên din ên Sûriyeyê û şandeyeke siyasî ji Kurdistanê Li Stadyûma 12’ê Adarê ya bajarê Qamişloyê pêk hat.
Di merasîma oxirkirinê de xelkê Rojava, pêkhateyên Kurd, Ereb, Suryan, Asur, endamên saziyên sivîl, partiyên siyasî, şêx û rûspî, merasîma oxirkirinê ya endamê Desteya Hevserokatiyê ya Partiya Yekitiya Demokratîk (PYD) beşdar bûbûn.
Di merasîmê de peyama sersaxiyê ya ji aliyê Rêber Apo ve hatibû, hate xwendin û wiha hate gotin:
“Dema ku Reheval Salih Muslîm ji vê cîhanê koç dike, min xebera koça dawî ya hevrêyê xwe yê hêja Salih Muslîm êvarê bihîst. Min heta sibê ew û têkoşîna wî anî ber çavên xwe. Bêguman, ji bo kur, xizm û hemû hevalên wî, ew êdî nemir e. Wî hêjayî gel û Welatê xwe jiyanek derbas kir û bû nemir. Ew welatparêzekî rastîn ê axa Sûriyeyê bû. Ew bi Kurdan re dibû Kurdekî temam; bi Ereban re dibû hevalekî jêneger, bi Tirkan re dibû birayekî heq. Wî Asûrî, Ermenî, Çerkes jî tê de bi her etnîsîte, ol û mezheban re avakirina têgihîştineke mirovane ya bêkêmasî, kir beşeke girîng ji jiyana xwe. Ew kevirek bingehîn ê dîwarê Rojava bû ku ez her tim pê bawer bûm û ew ê her û daîm wisa bimîne.
Ez wî wekî cêwiyê Sirri Sureyya dibînim ku di Pêvajoya Aştî û Civaka Demokratîk de ji nav me bar kir. Ew ê li ser vê bingehê, wek stêrka nemir a têkoşîn û aştiya me bimîne. Şehadeta Salih Muslîm ne wendahiyek e. Berevajî vê, ew ê heta hetayê gelê xwe, hemû gelan, netewe, dost û hevrêyên me wekî hêzeke heqîqî xurt bike.”
Piştre li ser navê Meclisa malbatên şehîdan Bavê Cûdî, li ser navê Partiya Yekîtiya Demokratîk (PYD) Foza Yûsif, li ser navê Bafil Telebanî Yekîtiya Nîştimanî ya Kurdistan Serdar Ebulah û li ser navê malbata Salih Muslim keça wî Perwîn Muslim axatin hatin kirin.
li ser navê Meclisa Malbatên Şehîdan Bavê Cûdî axivî û wiha got: “Kesê nemir dengek bû ku doza gel û mafên kurdan diparast û di demên herî dijwar de li kêleka malbatên şehîdan sekinî.” û destnîşan kir ku mîrateya wî ya siyasî dê beşek ji têkoşîna li herêmê bimîne.
Herwiha bi navê Partiya Yekîtiya Demokratîk (PYD) Foza Yûsif destnîşankirin ku Şehîd Muslim yek ji kesayetên ku di avakirina projeya rêveberiya xweser de roleke sereke lîstiye û kariyera wî ya siyasî qonaxek girîng di dîroka tevgera Kurd li Sûriyeyê de ye.
Li hember vê yekê, Serokê Yekîtiya Niştimaniya Kurdistanê, Bafil Talebanî, peyamek sersaxiyê şand û di merasîmê de Ji aliyê Serdar Ebdulah ve hate xwendin û got ku “Salih Muslim yek ji kesayetiyên siyasî bû ku jiyana xwe ji bo parastina mafên gelê Kurd û pêşxistina diyalogê di navbera hêzên Kurdî de terxan kir.” Û sersaxî ji malbat û gelê Kurd re xwest.
Keça Şehîd Mislim jî Perwîn Muslim li ser navê malbatê axaftinin dilşewat pêşkêş kir û tê de behsa rêwîtiya bavê xwe kir û tekez kir ku wî “jiyana xwe ji bo xizmetkirina doza xwe û gelê xwe terxan kiriye.” Û malbat bi qurbanî û helwestên ku wî di salên çalakiya xwe ya siyasî de dane serbilind e.
Piştî merasîma cenazeyê li Qamişlo, cenazeyê wî ji bo temamkirina merasîmên veşartina cenazeyê wî ber bi bajarê jidayikbûna wê, Kobanê ve hat veguhestin.
