Ayşa Silêman/ Dêrik
Şêniyên bajarê Dêrikê diyar kirin ku ew ê heya hênaseya xwe ya dawiyê parastina ax û welatê xwe bikin emê tucarî derfetê nedin dijminan ku destdirêjiyê li ser axa me bikin.
Li seranserî Rojavayê Kurdistanê şer û pevçûn çêbûye pir dijwar didomin gelê kurd rabûye ser piyan û li dijî çeteyên ku dixwazin hebûna gelê kurd qir bikin li berxwedidin. Ev berxwedanî netenê bi keç û xortan ve sînordare lê ji 7 salî heya 70 salî gel ji bo parastina taxên xwe derdikevin nûbetê.
Di derbarê parastin û nobeta gel ji bo taxên xwe dike welatiyên bajarê Dêrikê Xalid Hesen û Bawer Dêrik ji Rojnameya me re axivîn.
‘Yan mirinek bi rûmet yan jiyanek azad’
Welatiyê bi navê Xalid Hesen diyar kir ku ew ê hertim amadebin û li pişta hêzên xwe bin û wiha got: “Îro li Rojavayê Kurdistanê çeperên şer vebûne û hemû hêz û fermandarên me xwe amade kirine, lewma em jî wek şêniyên bajêr ji piçûk heyanî mezinan me ev erk girt ser milê xwe da ku em parastina axa xwe bikin. Her roj em li taxên xwe nobetê digrin ji ber ku gelek şaneyên çeteyan di herêmê de hene dixwazin tevlîheviyê çêkin û êrîşan pêk bînin. Bi vê yekê em him rê li pêşiya van şaneyan digrin him jî em aramiya herêmê diparêzin. Raste em ne aşiqê şerin lê dema hikumeta demkî rêzgirtina ked û şehîdên me yên ku ev 15 salin canê xwe ji bo axa Kurdistanê feda dikirin negirt, em neçarin berxwedanê bikin û rabin ser piyan heya ku em azadiya Kurdistanê misoger bikin. Em tucarî serî ji çeteyan re natewînin û em ê hertim li kolanan bin û piştgiriya hêza xwe bikin, yan mirinek bi rûmet yan jiyanek azad.”
Gelê kurd bi qehremanî dîrokê dinivîsînin
Welatiyê bi navê Bawer Dêrik da zanîn ku heya dilopek xwîn di laşê wan de heye ew ê li berxwebidin û wiha got: “Gelê Dêrikê bitevahî derketine kolanan û taxên xwe diparêzin, îro roj doz bûye doza kurdîtiyê lewma erkê hemû kurdên li tevahî cîhanê ew e ku destek bidin gelê Rojavayê Kurdistanê û bi şev û roj li ser piyan bin. Hat dîtin jî ku piştî ragihandina seferberiyê li Rojavayê Kurdistanê hijmarek baş ji gelê kurd berê xwe dan Rojava da ku cihên xwe diçeperên şer de bigrin û dest bidin. Em ê bi hemû hêz û îradeya xwe şer bikin, em ê ji dîrokê re isbat bikin ku gelê kurd serî natewîne û bi qehremanî axa xwe diparêzin. Banga me ji tevahî dewletên navneteweyî re ew e ku çavên xwe vekin û rewşa ku gelê kurd têre derbas dibe bibînin û xwedî li doza gelê kurd derkevin.”
