Ayşa Silêman/ Dêrik
Welatiya bi navê Rewşen Reşîd a ji bijarê Dêrikê ku beşdarî berxwedana Bendava Tişrînê bibû diyar kir ku ew salvegera berxwedana Bendavê û şehîdên wê bi rêzdarî bi bîrtînin û wiha got: “Bendava Tişrînê bû bendava berxwedan û têkoşînê.”
Bendava Tişrînê di sala 1999’an de li ser Çemê Firatê hatiye avakirin, ji ber rola xwe ya di dabînkirina avê û çêkirina elektrîkê de, yek ji girîngtirîn jêrxaneyên stratejîk ên li Sûriyeyê tê hesibandin, herwiha yek ji çavkaniyên herî girîng ên enerjiyê li Rojhilatê Sûriyê yê. Bi ketina rêjîma Baas re di berfanbara sala 2024’an re dewleta Tirk bi hevkariya komên çete li dijî herêmên Şehba, Til Rifet û Bendava Tişrînê êrişeke berfireh da destpêkirin. Gelê Bakur û Rojhilatê Sûriyê ji bo têkbirina êrişan berê xwe dan bendavê û tevlî berxwedana parastina wê bûn.
Di derbarê salvegera berxwedana Bandava Tişrînê welatiya bi navê Rewşen Reşîd ku beşdarî berxwedana bendavê bibû ji Rojnameya me re axivî.
‘Lehengiya bendavê nayê jibîrkirin’
Rewşen Reşîd da zanîn ku dema behsa şerê gelê şoreşgerî dikirin, me texmîn dikir ku wê di tax û bajarê me de bê, lê em negihiştbûn wê ferqê ku şerê gelê şoreşgerî wê li bendavê pêk were û wiha got: “Çiqasî mirov bêje nikare mafê wê bidiyê de, em wek şêniyên bajarê Dêrikê dema me berê xwe da bendavê bi moral û hestekî xurt me ev bar girt ser milê xwe. Tevî hemû şert û mercên dijwar, tang û topan jî lê têkoşêneke bê rawestandin li bendavê dihat kirin. Gel gavek şûnde ne tavêt berûvajî wê her êrişek rûdida bi kelecan û moral bang dikirin. Ew rojên dîrokî bûn ji ber ku her kêlî li ber çavê me ye û ew lehengî nayê jibîr kirin. Dema milet bi yek destî destek didan birîndaran û ji mirinê neditirsiyan, ez tê gihiştim ku ev e şerê gelê şoreşgerî yê ku me xeyal dikir.”
Rewşen Reşîd axaftinên xwe berdewam kir û wiha got: “Di roja duyem ji çûyîna me li bendavê gel derket qadê dîlan girtin û dengê tilîliyên dayîkan bendav xemilî bû û di nav wan kêliyên şoreşgerî de balefirên dagirkeriya Tirk êrişî me kir û her hevalek ji me ket alîkî. Min li xwîna diherikî dinêrî kesereke biêş ket dilê min, dijminekî zalim û hov bê sûc xwîna van sivîlan dirjîne. Dest û lingê min birîn bibûn, lê ji ber ku dilê min bi derdorê ve bû min êşa xwe hîs nekiribû.”
‘Gelê kurd bi hêz û çesarete’
Hemwelatiya bi navê Rewşen Reşîd axaftina xwe bidawî kir û wiha got: “Ez wan rojan jibîr nakim di hundirê dil û mêjî de hatine bicih kirin, tevî ku derfetên me yên tenduristî kêm jî bûn lê gel bi bijîşkan re bûn alîkar. Lê me moralê hevalên xwe hildida û me digot berxwedan jiyane, em pê razî bûne û divê em li ser piyan bisekinin. Şehîd bûn rûmete û heya em negihêjin asta şehadetê welatê me rizgar nabe. Heger li bendavê tekoşîn û berxwedanî çênebûban em nedigihiştin vê qonaxê, bi saya wan hevalên ku di çeperan de şer dikirin em îro li vir in. Bûyera şehadeta wan xort û keçan li ber çavê mine, ji ber ku em kurdin hertim êş û fedekarî ji bo me hatiye çêkirin. Ew roj di dîrokê de hatin nivîsandin bila herkes bizanibe gelê kurd bi çi hêz û çesaretî bû.”
