Hêvî Keleş/Qamişlo
Endama Hîlala Zêrîn Roz Hesen anî ziman ku Dibistana Niwêla, dibistana fêrkirina hunerên şêwekariyê, dengbêjî û muzîkê ye û got, “Em dixwazin nifşê nû çand û mîrasa xwe ya hunerî nas bike.”
Dibistana Niwêla ji aliyê hunermendên herêmê di sala 2020’an de li Qamişloyê hate vekirin. Dibistan bi navê şehîd Nuwêla (Rîhan Hesen) hate navkirin, ji ber Şehîd Niwêla bi hezkirina xwe ya ji huner û stranbêjiyê re dihate naskirin û her wiha li gelek amûrên muzîkê dida.
Derbarê Kar û xebatên ku Dibistana Niwêla dide meşandin Endama Hîlala Zêrîn Roz Hesen ji Rojnameya me re axivî.
‘Dibistana Niwêla di bin sîwana Hîlala Zêrîn de hate avakirin’
Endama Hîlala Zêrîn Roz Hesen diyar kir ku Dibistana Nuwêla di bin sîwana Hîlala Zêrîn de ava bûye û wiha got:
“Ev pênc sal in ku Dibistana Nuwêla hatiye vekirin, navê Nuwêla jî ji navê jina şoreşger ya ku bi hunerê mijûl dibû, ji bo mayîndekirina hest û hunera wê me navê dibistanê kir Şehîd Nuwêla. Di dibistana Nuwêla de beşên cuda hene, mîna Muzîk, Şano û wênesazî û her yek ji wan jî li ser du astan e, li gorî hejmara şagirtan, Mamoste û hunermendên pispor çavdêriya wan beşan dikin. Di beşê Muzîkê de keman, erbane, gîtar û tembûr hene û ew jî li ser du astan e. Xwendekar destpêkê nota û stranbêjiyê bi awayekî teorîk fêr dibin, piştre derbasî pratîkê dibin û fêrî lêdana amûrên muzîkê dibin.
Her wiha di her beşekî de ji bo fêrkirina şagirtan memosteya wê heye, minhac heye li gorî wî minhacî em wan şagirtan fêrdikin. Tenê zarok û jinên ciwan ên temenên wan di navbera 8 heta 40 saliyê de em pêşwazî dikin û em wan di aliyê teorîk û pratîk de perwerde dikin.”
‘Huner, rêbazeke veguhastina mîrasa çandî ye’
Roz Hesen axaftina xwe wiha qedand: “Hin astengî di karê me de derbas dibin ew jî fêrkirina yên bi temen mezin e, ji ber dema ku temenê wan biçûk be bêhtir zû fêr dibin û zehmetiyan di fêrkirina wan de nabînin. Hejmara şagirtên me jî nediyar e ji ber dema ku dibistan vedibin şagirtên me kêm dibin û di havînê de dîsa tên fêrî dersên xwe dibin li vir, ji ber zêdebûna şagirtan em li ser du danan didin yê sibeha û yê piştî nîvro. Her sal Mehrîcana zarokan heye di meha 9’an de ye şagirtên me yên muzîkê, şano û wênesaziyê beşdarî mihrîcanê dibin, bi wêneyên xwe, lêdna amûran û şano beşdar dibin. Mebesta me ji avakirina Dibistana Nuwêl ji bo fêrkirina zarokan li ser mîras, huner û çanda kurdan, bi taybet huner ji ber ku huner, rêbazeke veguhastina mîrasa çandî ye.”
