Birûc Resûl/Qamişlo
YRJ’ê bi boneya 5`emîn salvegera damezrandina xwe daxuyaniyek da û got, “Li ser bingeha felsefeya Rêber Abdullah Ocalan ku azadiya jinan bingeha azadiya civakê ye, em bawer in ku dengê jinan di rojnamegeriyê de gaveke cewherî ya ber bi avakirina civakeke adil û azad ve ye.”
Bi boneya 5`mîn salvegera damezrandina Yekitiya Ragihandina Jin (YRJ), bi amadebûna bi dehan rojnamevanên jin ên li Herêma Bakur û Rojhilatê Sûriyê li Navenda Mihemed Şêxo ya Çand û Hunerê li bajarê Qamişlo daxuyaniyek hat dayîn.
Di destpêka daxuyaniyê de hat diyarkirin ku damezirandina Yekîtiya Ragihandina Jin YRJ`ê weke pêwîstiyeke dîrokî bû û wiha hat gotin: “Li dijî zihniyeta baviksalar a ku hebûna jinan bi dirêjahiya sedsalan paşguh kiriye, tê dikoşe. Damezirandina YRJ’ê ne tenê gaveke rêxistinî bû, lê encama daneheva têkoşîneke demdirêj a jinan di qada çapemeniyê de û fedakariyên mezin ên ku jinên rojnamevan di oxira gihandina rastiyê de dane, hat avakirin. Em bi vê boneyê hevrêyên xwe yên şehîd Cîhan Bîlgîn, Dilîşan Îbiş, Eylol Nohilat, Rohenda Efrîn, Dilovan Gever, Arîn Cûdî û hemû kesên di oxira avakirina ragihandineke jinan a berxwedêr de jiyana xwe feda kiriye, bi bîr tînin. Dengên wan bûn çira û rêya têkoşîna me ya berdewam ronî kir.”
Daxuyanî wiha hat berdewamkirin: “Em rojnamegeriyê wekî amûreke berxwedana fikrî û rêxistinî dibînin. Li ser bingeha felsefeya Rêber Abdullah Ocalan ku azadiya jinan bingeha azadiya civakê ye, em bawer in ku dengê jinan di rojnamegeriyê de gaveke cewherî ya ber bi avakirina civakeke adil û azad ve ye. Her çend tecrubeya YRJ’ê tenê 5 salan dom dike jî, ew li ser mîrateyeke xurt û berfireh ava dibe ku demeke dirêj e sazûmankirina baviksalariyê dixe ber pirsyariyê û hewl dide alternatîfên wê biafirîne. YRJ wek yek ji formên vê sazûmankirina alternatîf derketiye pêş. Îro zêdetirî 500 rojnamevan û nûçegihanan, YRJ çalakiyên xwe di tevahî warên çapemeniyê de berdewam dike û cihê xwe wek dika altarnatîfa çareserkirina dozên civakî, jîngehî, aborî û siyasî xurt dike û girîngiyê dide pirsgirêkên jinan.”
Di dawiya daxuyaniyê de hat zanîn ku li Bakur û Rojhilatê Sûriyeyê, jinên rojnameger roleke pêşeng di veguhastina rastiya şer û berxwedanê de ji cîhanê re lîst, ew di gihandina dengê gel de bi rêya belgekirina her kêliyeke têkoşînê li dijî dagirkeriyê, talankirin û wêrankirina li dijî binesaziya civakî, bi ser ket û wiha pêde çûn: “Jinên rojnameger ketin eniyên pêş û bi israreke mezin li hember hewldanên bêdengkirinê û çewisandina rastiyê sekinîn. Rojnamevanan ev yek bi kamera, deng û pênûsan ku wek alavên berxwedan û aşkerakirina rastiyê kirin. Ruxmî zêdebûna krîzên siyasî, aborî û mirovî li Rojhilata Navîn û cîhanê, em diyar dikin ku projeya me ya avakirina ragihandina demokratîk a azad nasekine. Em têkoşîna xwe ya ji bo ragihandineke rewşa jinan û têkoşîna gelan nîşan bide dewam dikin, hişmendiya civakê ber bi nirxên azadî, wekhevî û jiyana hevbeş ve bi pêş bixe. Bi vê boneyê, em silavên xwe yên serbilindiyê ji her jineke di zeviya ragihandinê de dixebite û ji her jineke di avakirina dengê azad û serbixwe de dibe alîkar re dişînin. Em diyar dikin ku, pabendî dewamkirina rêya me dest pê kiriye ne û em ê armancên YRJ’ê pêk bînin.”
Daxuyanî bi diruşmeya Jin, Jiyan, Azadî hat bi dawî kirin
