Tekîldarê rewşa siyasî ya dawiyê a heremê Federasyona Gaziyên Bakur û Rojhilatê Sûriyeyê ji bo gaziyên şer ên Qamişlo û Şedadê civîn li dar xistin.
Di bin banê Federasyona Gaziyên Bakur û Rojhilatê Sûriyeyê (FGBRS) de duh ji bo gaziyên şer ên Qamişlo û Şedadê têkildarî rewşa siyasî ya herêmê û xebatên rêxistinî civîn hatin lidarxistin.
Civîna li Qamişloyê bi deqeyek rêzgirtina ji bo tevahî şehîdên Tevgera Azadiya dest pê kir. Civîn ji aliyê endamên FGBRS’ê Azadî Hesen û Elî Ehmed ve hatin rêvebirin.
Azadî Hesen a di civînê de axivî, têkildarî rewşa piştî banga Rêber Apo ya 27’ê Sibatê guhertinên li herêmê çêbûne nirxandinên girîng kirin. Azadî Hesen diyar kir ku Banga Aştî Civaka Demokratîk a Rêber Apo bandoreke pir erênî li ser tevahiya Rojhilata Navîn kiriye û ew bang ji hêla hemû gelên herêmê ve bi taybet ji hêla jin û ciwanan bi coş hatiye pêşwazîkirin.
Her wiha rewşa Bakur û Rojhilatê Sûriyeyê jî weke yek ji mijarên sereke hat destgirtin. Di civînê de hate destnîşankirin ku di vê pêvajoya dîrokî de erkeke herî girîng ew e ku gaziyên şer li qadên Bakur û Rojhilatê Sûriyeyê bi rola xwe ya pêşengtiyê rabin.
Piştî rewşa siyasî têkildarî rewşa rêxistinî û fealiyetên gaziyên şer ên di vê pêvajoyê de nîqaş hatin kirin. Gaziyên şer ên mafê axaftinê wergirtin, diyar kirin ku ji bo di vê pêvajoyê de pratîkeke layiqî Rêbertî, şehîdan û gelên herêmê pêş bixin, wê hê bêhtir bi kar û xebatên xwe rabin.
Li Şedadê jî civîn
Li herêma Şedadê ya kantona Cizîrê jî gaziyên şer bi civînekê têkildarî rewşa dawî ya herêmê nîqaş û nirxandin kirin.
Di civînê endamê Federasyona Gaziyên Bakur û Rojhilatê Sûriyeyê Laleş Êzidî bal kişand ser parastina nirxên şoreşê û got, “Me şoreşa Bakur û Rojjhiatê Sûriyeyê bi xwîna bi hezaran şehîdan û gaziyên şer ava kir. Ji bo parastina vê şoreşê û ewlehiya gelên herêmê ji niha şûn ve jî em ê bi hemû hêz û îradeya xwe têkoşîna xwe bidomînin.”
