Hemza Sêvo/ Qamişlo
Festîvala Fîlmên Kurdî ya Duseldorfê ya duyemîn wê di 23’ê Nîsanê de bi beşdariya 40 fîlm û kurtefîlmên cihêreng li ser asta Kurdistanê bi dirêjahiya 5 rojan were destpêkirin. Îsal ji bo piştgiriya Şoreşa Rojava wê ev festîval bê lidarxistin û sê fîlmên ku Bavê Teyar tê de beşdar bûbû, werin pêşandan.
Festîvala Fîlmên Kurdî ya Dusseldorfê di roja 23’ê Nîsanê de dest pê dike, Fîlm wê li Almaniya, bi taybet li sînemayên Ufa Palast û Metropolê yên Dusseldorfê bên nîşandan.
Festîvala Fîlmên Kurdî ahengeke çandî ye, tê de fîlm û kurtefîlmên kurdî tên nîşandan. Îsal jî bi armanca pêşxistina qada hunerî ji fîlmên kurdî û hem jî parastina çand û hunera sînemaya kurdî duyemîn Festîvala Fîlmên Kurdî wê were lidarxistin.
Di festîval wê 40 fîlmên dirêj û kurtefîlman ji hemû parçeyên Kurdistanê werin pêşandan. Piraniya fîlman kurdî ne, hin ji wan hatine wergerandin û hin ji wan jî bi gelek zimana wê werin pêşandan, weke fîlmên bi zimanê erebî, îngilîzî, hollandî û fransî.
Îsal ev fastîval ji bo piştgiriya Şoreşa Rojava were lidarxistin herwiha wê fîlmên Hat Nehat, Xweş Xeber û Kurmê Darê bên pêşandan, hêjayî bibîrxistinê ye ku ev her sê fîlm jî Şehîd Bavê Teyar tê de beşdar bûbû.
Di heman demê de wê hejmareke gelek ji fîlm û kurtefîlm bên pêşkêşkirin, weke ‘Eine Brücke Nach Rojava’ yê Ekrem Heydo, ew 66 deqîqe ye, ‘Beriya Şevê’ 60 deqîqe ye û derhênerê wê Alî Kemal Çinar e. Di heman demê de wê gelek kurtefîlm bên pêşandin ji wan ê bi navê ‘Ziman’ e dirêjahiya wê 8 deqîqe ye. Hem jî wê kurtefîlmê bi navê ‘Gate’, ‘Goran’ û ‘Zaro Zemar’ bên pêşandan.
Wê gelek hunermend, şanoger, lîstikvan, rewşenbîr û kesên din li ser asta Kurdistanê tevlî Festîvala Fîlmên Kurdî bibin.
Festîval wê bi fîlmê “The Virgin and Child” were destpêkirin. Fîlmê 80 deqîqe ye û wê di saet 8’ê şevê de li sînemaya Ufa Palastê bê nîşandan. Ev fîlm behsa çîroka kesayeta bi navê Avesta ya Êzidî dike ku ji lepên DAIŞ’ê rizgar bûye.
Wê li ser asta 5 rojan ev festîval bê domandin, herî dawî wê Merasîma xelatdayînê ya Duyemîn Festîvala Fîlmên Kurdî ya Dusseldorfê di 27’ê de piştî pêşandana fîlman û belavkirina xelatan wê bi dawî bibe. Xelatên bi navê ‘Xelata Jîna Emînî’, ‘Xelata Fîlman a Mafê Mirovan’, Xelata Xelîl Dag a Sînemaya Berxwedêr’ û ‘Xelata Fîlman a Yilmaz Guney’ bên pêşkêşkirin. Wê her xelatek ji her çar xelatan ji parçeyekî Kuridstanê re bê dayîn.
