Lîloz Hisên/Qamişlo
Derhênerê Sûrî yê ji bajarê Siwêdayê Mein Diwêir ku tevlî 7’emîn Festîvala Şehîd Yekta herekol bibû, tekez kir kir ku ew bi hêvî ne mîna tecrûbeya Festîvala Şehîd Yekta Herekol dûbare bibe û got: “Pirrengiya di festîvalê de bedewiya bajarê Qamişlo nîşan da.”
Ji bo bîranîna şanogerê nemir Şehîd Yekta Herekol û di Roja Şanogeriyê ya Cîhanî de, her sal Festîvala Şehîd Yekta Herekol bajarê Qamişlo tê li dar xistin. Îsal jî rengîniyeke vê festîvalê hate diyarkirin, ji gelek deveran tevlîbûna festîvalê hate kirin, ji Başûrê Kurdistanê, Rojhilatê Kurdistanê, Reqa û parêzgeha Siwêdayê gelek derhêner, lîstkvan û kom beşdar bûn.
Koma Rêveberiya Çandê ya ji bajarê Siwêdayê di Festîvala 7’an a Şanoyê ya Şehîd Yekta Herekol de beşdar bibû. Vê komê di seranserî 40 salî de ji bo pêşxistina şanogeriyê xebat daye meşandin û gelek berhemên wê yên civakî, rewşenbîrî û hwd.. hene.
Koma Rêveberiya Çandê ya ji bajarê Siwêdayê di salên 80’ê de hate avakirin û zêdetirî 40 berhem pêşkêş kir.
Vê komê di 6’ Nîsanê de di Festîvala Şehîd Yekta Herekol şanoyeke bi navê (Îcar) Kirê pêş kêş kir. Nivîskarê vê şanoyê Ebdulnebî El Zêdî ye, derhênerê wê Mein Diwêir û lîstkvana wê jî Fadiya Ebû Tirab e.
Di lîstikê de bal hate kişandin li ser êşa dayikê ku zarokên xwe di şer de yek li dû yekî winda dike, di nava vê êşa kur de bi tena xwe di nava çar dîwarên malê de dimîne.
Derbarê tevlîbûna komê di Festîvala Şehîd Yekta Herekol de, derhêner Mein Diwêir ji Rojnameya me re axivî.
Derhêner Mein Diwer diyar kir ku nameya wan ji şanoya ku hate pêşkêşkirin, rêgirtina ber tundiyê ye û wiha domand: “Em hatin Qamişlo û bi tevlîbûna festîvala Şehîd Yekta ku pirrengîn e kêfxwşbûn. Di demên borî de gelek tevlîbûnên me li ser vê dike çêbibûn, di dema heyî de vegera min û pêşkêşkirina şanoyan li ser dika navenda çandê piştî 34 salan ez pir kêfxweşbûm. Li bajarê Qamişlo gelek hunermendên jêhatî hene û dika şanoyê dewlemend kirine.”
‘Pirrengiya festîvala Şehîd Yekta bedewiya bajarê Qamişlo nîşan da’
Mein Diwêir bal kişand ser tevlîbûna wan di festîvalê de û wiha domand: “Dema ku em hatin vexwendin ji bo
tevlîbûna festîvalê em pir ne hizirîn, rasterast me biryar da ku tevlî vê festîvala xwedî taybetmeniyek cuda bibin, di kesayeta min de bajarê Qamişlo giringiyeke wê di bîra min de heye, hem bedewiya wê ya çandî, fiklorî û fikrî heye, herwiha pirrengiya di festîvalê de bedewiya bajarê Qamişlo nîşan da.”
Mein Diwêir wiha domand: “Di rojên festîvalê de me xebateke xweşik û komî li ser dika vê navendê dît, hem li ser asta amadekarî, pêşwazîkirina mêvanan û şanoyên ku hatin pêşkêşkirin. Pirrengiyê ku festîvalê pir bi wate û balêkş kir. Di salên borî de min Festîvala Şehîd Yekta Herekol dişopand, tevlîbûna me pir zehmet bûn di şert û mercên berê de. Em spasiya her kesê ku rol lîst di serkeftina vê festîvalê de; dikin. Em hêvî dikin ku di demên pêş de mîna van tecrûbeyan ji bo me dûbare bibe.”
Mein Diwêir axaftina xwe wiha qedand: “Em bi tirs bûn ji bo hatina herêmê piştî qutbûyîna gelek salan, bi taybetî ji ber şert û mercên dijwar ên ewlehiyê yên salên borî, lê piştî ku em hatin Qamişlo nêrîna me guherî û em kêfxweş bûn ku me rêxistin, aramî û ewlehî li herêmê dît.”
