Lîloz Hisên/Qamişlo
Di bin drûşmeya “Azadiya Rêber Apo Azadiya Me Ye” û bi pêşengiya Saziya Malbatên Şehîdan, meşek girseyî li ser asta kantona Cizîrê li bajarê Qamişlo hate lidarxistin.
Bi armanca şermezarkirina berdewamiya sîstema îşkence û qirkirinê li dijî Rêber Abdullah Ocalan, Saziya Malbatên Şehîdan meşke girseyî li dar xist. Meş ji çerxerêya Osman Sebrî dest pê kir û nêzê navenda Mihemed Şêxo ya Çand û Hunerê veghurî mitîngê.
Bi sedan ji şêniyên kantona Cizîrê tevlî meşê bûn, wêneyên Rêber Abdullah Ocalan û drûşmeya“Azadiya Rêber Ocalan kilîta aştiyê li Rojhilata Navîn e, Azadiya Rêber Apo Azadiya Me Ye” hildan.
Piştî meş gihaşt nêzî navenda Mihemed Şêxo ya Çand û Hunerê, deqeyeke rêzgirtin ji bo giyanê şehîdên azadî û rûmetê sekinîn.
Piştre li ser navê Meclisa Malbatên Şehîdan Mesûm Hesen axivî û wiha got: “Ji bo civakek xwedî îrade, nasname, hêz û rêxistinkirî, Rêber Apo ji bo me berxwedan û têkoşînê dike. Her çiqas em çalakî û xebatan bikin jî, lê li hember keda Rêber Apo ya ji bo civakeke azad wê qels be. Dewleta Tirk dixwest di Îmraliyê de dawî li netew, ziman û çanda kurdan bîne, lê Rêber Apo berê wê guhert aliyekî din, Îmralî îro bû cihê rastî, demokrasî û bratiya gelan.”
‘Divê deriyê Îmraliyê bê vekirin’
Mesûm Hesen bal kişand ser banga Rêber Apo ya aştiyê û wiha berdewam kir: “Banga Rêber Abdullah Ocalan banga aştiya hemû gelan û çareseriya doza kurdî di herêma Rojhilata Navîn de ye, bêdengiya cîhanê û dirûtiya wê li hember girtina Rêber Apo domandina komployê nîşan dide, eger hêzên cîhanî û dewleta Tirk niyeta wan ya çareseriyê hebe divê deriyê Îmraliyê bê vekirin. Rêber Apo bi raghandina pêvajoya aştiyê xwest rê li ber kuştin û penaberiyê bigre, divê gelê herêmê û navnetewî bi giştî piştgiriyê bidin peyama rêber Abdullah Ocalan.”
Di dawê de Mesûm Hesen bi navê gelê kantona Cizîrê bang li cîhan, hêzên navnetewî, komîteya CPT û hemû kesên eleqdar kir ku gerek mudaxeleyek acil çêbe û deriyê Îmraliyê bê vekirin ji bo çareseriya dozên hemû gelan û di serî de pirsgirêka gelê kurd bê.
