Dilovan Kêfo / Amûdê
Lîstikvana futbolê Helez Hacî diyar kir spor ji bo tendirustiya mirov xwedî girîngiyeke pir mezin e û wiha got: “Bi rêya sporê pergala berevaniya laşê mirov bihêz dibe û di milî derûnî de jî mirov rehet dibe.”
Piştî şoreşa Rojava jinên ciwan di qada sporê de bi awayekî aktîv cihê xwe girtin û qada spora jinan heêmê pêş xistin. Yek ji jinên ciwan ku di qada spora jinan de xwe daye isbatkirin, lîstikvana futbolê a ji bajarê Dêrikê Helez Hacî ye.
Helez Hacî ji temenê 12 salî ve ji futbolê hezkiriye û dest bi lîstina futbolê kiriye. Di destpêkê de wê li dibistanê dest bi fêrbûna futbolê kiriye. Roj bi roj asta wê pêşketiye û ew tevlî gelek tîmên futbolê yên li Dêrkiyê bûye û niha ew lîstikvana yaneya Asayîşê ye.
Derbarê mijarê de lîtkvana futbolê Helez Hacî ji rojnameya me re axivî û wiha got: ” Di warê sporê de malbata min pir piştgiriya min kir, lê tişta ku mirov xemgîn dike, heta niha jî zihniyeta ku dibêje spora futbolê tenê ya mêran e nehatiye guhertin. Lê min bi israr û hezkirina spor tevahî nerînên neyênî derbas kirin û roj bi roj serkeftinan di warê sporê de bidest dixim. Tu carî moralê min kêm nebû.”
Helez Hacî wiha domand: “Têkilyên min bi hevalên min re pir baş e, em mîna malbatatekê ne, em hemû ji bo yekî ne û yek ji bo hemûyan ,e hêza me bi yekîtiya me ye, dema ku ne aramî di nav tîmê de çêdibe em bi hezkirin û yekîtiya xwe hemû tiştî çare dikin, ya herî girîng ku em hertim bi yek rihê lîska xwe dikin.”
Lîstikvana futbolê Helez Hacî di dawiya axaftina xwe de wiha got: “Lîstikvanên jin heta ku karibin pêşbikevin, pêwîs e kedê bidin û xwedî îradeyeke xurt bin. Bi hezkirin û vînê tevahî astengî derbas dibin. Dema ku ez dest bi lîstina futbolê dikim, destpêkê ez ji xwe re dibêjin, ez bihêz im û ez ê biserkevim. Hêviya min ku ez li ser asta cîhanê bibim lîstikvaneke navdar û her kes min nas bike. Xeyalên min ew e ku ez di warê sporê de hedem serkefî bim û her kes ji min hez bike. Bi ked û israre tiştek nemumkin tune ye.”
