Ayşa Silêman/ Dêrik
Hêzên Ewlekariya Hundirîn (Jin) a Bakûr û Rojhilatê Suriyeyê, bi desteka YPJ’ê li dijî hewldanên şaneyên DAIŞ’ê, li kampa Roj, operasyon da destpêkirin
Fermandariya Giştî ya Hêzên Ewlekariya Hundirîn (Jin) a Bakur û Rojhilatê Sûriyê ji bo destpêkirina hemleya ewlehiyê ya bi pêşengiya “Hêzên Jin” li dijî şaneyên DAIŞ’ê li kampa Roj daxuyaniyek dan.
Di destpêka daxuyaniyê de bal hat kişandin li ser pêşketên ewlehî û êrişên dubare yên ku herêm bi giştî û Bakur û Rojhilatê Sûriyê bi taybetî rastî wê hatin, şanên terorîst ên DAIŞ`ê ji vê rewşê sûd wergirtin û hewl dan ku rêzên xwe ji nû ve birêxistin bikin û planên terorane bi mebesta têkbirina ewlehî û aramiya herêmê pêk bînin. Hêzên Ewlekariya Hundirîn ev tevgerên metirsîdar ên van şaneyan, bi taybet li kampa Roj, şopandin. Di demên dawî de, çend hewldanên derbasbûna kampê ji aliyê şaneyên DAIŞ`ê ve hatin kirin ku derbasî hundirê kampê bibin û jiyana neşteciyên wê bixin bin gefan. Van şaneyan jinek û zarokek bi xwîneke sar kuştin û destdirêjî li hejmarek jin û zarokan kirin. Her wiha gef li wan kesên ku hewl didin xwe ji ideolojiya tundrew a vê rêxistina terorîs rizgar bikin, kirin. Ev tevgera çeteyan di çarçoveya xebatên berdewam ên DAIŞ’ê de ye, ji ber girîngiya stratejîk a kampa Roj û ji bo geşkirina şaneyên razayî yên li hundir û derveyî kampê, tên kirin.
Di berdewamiya daxuyaniyê de wiha hat gotin: “Li hember van gefan, hêzên me çendîn operasyonên pêşîgirtinê li dar xistin û hejmarek ji planên terorîstan têk birin. Di vir de jî şaneyên DAIŞ`ê di hewildanên xwe yên belavkirina aloziyê û têkbirina aramiyê de derbeyên giran xwarin. Li ser bingeha berpirsyariya xwe ya ji bo parastina gelê xwe û pabendbûna me ya bi têkoşîna li dijî terorê, em di Hêzên Ewlekariya Hundirîn (Jin) de bi piştgiriya Yekîneyên Parastina Jin (YPJ) destpêkirina hemleya ewlehiyê ya Hêzên Jinê yên di nava hêzên me yên ewlekarî û leşkerî de li dijî şaneyên DAIŞ’ê radigihînin ku armanca me lêgerîna li kampa Roj, şopandin û girtina şaneyên razayî û alîkarên wan e.”
Daxuyanî wiha bidawî bû: “Ev hemle berdewamiya tekoşîna me ya berdewame ku li dijî hemû hewlên terorîstên DAIŞ`ê û nîşana îradeya me ya bibiryar ji bo zuhakirina jêderên terorê û peydakirina ewlehî û aramiyê ji bo hemû pêkhateyên civaka me ye. Em weke Hêzên Ewlekariya Hundirîn (Jin) tekez dikin ku hemleya me heta ku em dawî li gefên şaneyên terorîst ên li dijî mirovên bê guneh dikin bînin, wê berdewam be. Her wiha wê parastina gelê me û pêkanîna ewlehiyê dê bibe karê me yê pêşîn ku em jê gavan paşde neavêjin.”
