Hemza Sêvo/ Qamişlo
Ji bo eşkerekirina encama Pêşbirka Helbesta Kurdî ya Ciwanan, Hevgirtina Rewşenbîrên Rojavayê Kurdistanê (HRRK) daxuyaniyeke çapemeniyê da û tê de jî navê 5 helbestvanên ciwan ên kurd ên serkeftî, ragihand.
Îro HRRK’ê li navenda xwe ya li bajarê Qamişlo bi daxuyaniyeke çapemeniyê navên helbestvanên serkeftî di Pêşbirka Helbesta Kurdî ya Ciwanan de, da eşkerekirin. Tê de jî helbestvan Fatma Eto, Dilyar Hebîb, Sebrî Elî, Aras Mihemed Xêr û Ayfer Yildizistan di pêşbirkê de bi astên cuda xelat wergitin.
Daxuyanî bi zimanê kurdî hat xwendin û endamên Desteya Nirxandina Helbestê ya HRRK’ê, cîgir û endamên wê amade bûn.
Di destpêka daxuyaniyê de wiha hat gotin: “Di 1`ê Çileya sala 2025’an de, bi alîkariya Komeleya Janê Xelef a Xêrxwaziyê li Ingilistanê, Hevgirtina Rewşenbîrên Rojavayê Kurdistanê(HRRK), ji bo cara pêncemîn lidarxistina Pêşbirka Helbesta Kurdî ya Ciwanan a Sala 2025’an, ragihand û bi awayekî berfireh di rêyên cûrbecur re mercên beşdariya pêşbirkê bo ciwanên kurd ên Rojavayê Kurdistanê belav kir. Diviyabû ku di 10’ê Adarê de deriyê beşdariya pêşbirkê were girtin, lê ji ber rewşa awarte ya li Sûriyê bi giştî û li Rojava rû dan piştî hilweşîna rejîmê, herwiha êşa koçberiya duyemîn ya gelê me yê Efrîn û Şehbayê, Komîteya Amadekar biryar da ku dema rêkirina berheman heta 20`ê Adarê were dirêjkirin. Herwiha Komîteya Nirxandinê ya Pêşbirka Helbesta Kurdî Ya Ciwanan a sala 2025’an ji Ehmedê Huseynî, Merwan Berekat, Stêrê Çelo, Ebdilwehab Pîranî û Kemal Necim dihat avakirin. Di pêşbirka îsal de, komek ciwan, ji hemû herêmên Rojavayê Kurdistanê beşdarî pêşbirkê bûn.”
Di berdewamiya daxuyaniyê de HRRK’ê wiha eşkere kir: “Piştî xwendin û têramandin û hewldanên Komîteya Nirxandinê yên ji dil û can da ku bikaribe helbestirîn helbest ji bo xelatan hilbijêre û piştî berhevkirina encamên her endamekî komîteyê û nêrînên hevpar û hevbeş di hilbijartinan de, encamnameya pêşbirkê wisa encam da: Helbesta asta yekem bi navê (Bihêle di Vê Şevê de Hebhinarkê) ya helbestvan Fatma Eto ye. Helbesta asta duyem bi navê (Roja Tu Çû) ya helbestvan Dilyar Hebîb e. Helbesta sêyem a bi navê (Pelên Zemînê) ya helbestvan Sebrî Elî ye. Helbesta asta çarem bi navê (Rê) ya helbestvan Aras Mihemed Xêr e. Helbesta asta pêncem: Helbesta bi navê (Sêrbenda Dêrîn) ya helbestvan Ayfer Yildizistan e.”
HRRK’ê daxuyaniya xwe wiha bi dawî kir: “ Tevî hemû rewş û geşedanên awarte, tevî êşa koçberiyê û êrişên berdewam ên li ser erdnîgariya vî welatî jî, ciwanan bi vîn, biryadarî û dilosoziyeke mezin xwedî li bîr û boçûn û ramanên xwe derketin, xwedî li çand, nasname û zimanê xwe derkrtin û bi hemû şêwe û cureyên hûnandinê belbestên bedew bi kurmanciyeke resen pêşkêşî pêşbirkê kirin. Em serkeftin û berdewamiya afirandin û dahênan û gera li asoyên nû û teze û roj li pey rojê gurkirina hestên derbirîna Kurmanciyê û zeftkirina alavên rasteqîne yên xeyal û nîgaşên Kurdiyê ji hemû beşdaran re dixwazin, bi hêviya ku hemû aliyên peywendîdar li ciwanên Kurd xwedî derkevin û hewldanên wan ên nivîsandinê binirxînin û piştgiriya wan bikin.”
Hêjayî bibîrxistinê ye ku wê her 5 helbestvan bi 5 astan xelatên pêşbirkê werbigirin. Xelata helbesta ku asta yekem werdigire 500 dolarê Amerîkî ye. Herwiha xelata duyemîn 400 dolar e, xelata 3’yan 300 dolar e, ya çaremîn 200 û xelata 5’an jî 100 dolarê Amerîkî ye.
