Nehîr pale
Di navbera komkujiya 25`ê Hezîrana sala 2015`an û komkujiya 15`ê Adara sala 2025`an cûdayî nîne. Çeteyên DAIŞ`ê roja 25`ê Hezîranê ber bi sibehê ve ketin gundê Berxbatan û bajarê Kobanê. Li pêşiya xwe kî dîtin kuştin û ketin malan zarok, ixtiyar, jin û mêr dan ber gulan. Mîna ku tola sedê salan ji gelê Kurd digrin, bi hovîtî kuştin û serjêkirin. Li pey vê komkujiyê ji derveyî kesên ku şehîd ketin gelek kes seqet man û zarok bê dayîk û bav man. Niha temenê wan mezin bûye, 11 sal li ser komkujiya 25`ê Hezîranê re derbas bû, lê nayê jibîr kirin. Hemû kesên ku bibûn şahidê vê komkujiyê wan kêlî, saet û rojên komkujiya 25`ê Hezîranê jibîr nakin. Narîn Ebdo şahida komkujiya 15`ê Adarê ye lê ew bi tenê ye û yên di komkujiyê de şehîd bûn, xwişk, dayîk, bav û birayên wê bûn.
Roja şemiyê 14`ê Adarê saet 11:45 balafirên dewleta Tirk a dagirker mala Osman Ebdo bombebaran dikin. Ew li mezreyeke başûrê Kobanê di navbera gundê Qumçî û gundê Berxbatan de dimîn in. Ew malbata ji bo debara jiyana xwe bike, li wê mezreyê dixebitîn. Hejmara wan 11 kesin, keçika herî mezin Ronîda 19 salî ye û Avesta jî 8 mehî ye.
Piştî balafir ciyê wan bombebaran dike, tenê dîwarekî mala wan tê xwarê û ew ji bo neyên kuştin hemû di bin balafirên keşfê de direvin doleke piçekî ji mezreyê dûr e. Balafira şer dîsa li wan dixe û ji malbatê 9 şehîd dibin, Ronîda keça mezin û Narîna 8 salî jî birîndar dibin. Piştî lêdana wan êdî destpê dikin hemû gund û erdnîgariya derdora wan topbaran dikin. Ji ber balafirên keşfê digerin û bi dijwarî her deverê topbaran dikin, kesek nikare biçe ciyê malbata Osman Ebdo û bi wan re bibin alîkar. Rêbazên dewleta Tirk a dagirker ên pêkanîna wê komkujiyê ji rêbazên çeteyên DAIŞ`ê yên 25`ê Hezîranê pêk anîn ne cûda ne.
Duh 18`ê Adarê bi hezaran gelê Kobanê tevlî merasîma cangoriyên komkujiyê bûn. Cenazaya dayîk, bav û zarokan rêz kiribûn û li gel hevdû spartin axê. Di heman rojê de Ronîda ku giran birîndar bibû, şehîd bû û di 19`ê Adarê de ew li gel dayîk, bav, xwişk û birayên wê spartin axê. Tenê Narîna 8 salî ma ye.
Gelê Tirk dibe ku ji dîroka xwe şerm bike; desthilatiya vê demê mîna desthilata berî xwe komkujiyan dike. Dîrokeke wan a gelekî bixwîn û gemar heye, ev têrê dike ku dewleta wan hov û paşverû were naskirin.
Dewleta Tirk a dagirker ne ji şer û ne jî ji aştiyê fêm dike. Di pêvajoya guhertin û veguhertina demokratîk a ku Rêber Apo destpêkirî komkujî pêk anîn. Ew malbat ne leşker û ne jî li eniyê bûn. Di çandiniyê de dixebitîn da ku pêdiviyên xwe pêk bîn in. Bila ev komkujî neyê jibîr kirin; 7 jin di wê komkujiyê de hatin qetil kirin. Şehadeta wan dilê gelê Kurd birîn kir û mîna komkujiya 25`ê Hezîranê ev birîn wê her tim di salvegera xwe de xwîn bibe.
