Esma Mistefa/ Qamişlo
Yekemîn Konferansa Jinên Kurd li Rojava di bin dirûşmeya “Bi pêşengtiya jinên Kurd yekîtiya netewî ya kurd misoger bibe” li bajarê Qamişlo, bi beşdariya 300 delegeyên jin ji Rojava, giştî Kurdistan û Sûriyê, hat lidarxistin.
Bi vexwendina 300 delege ji jinên kurd ji tevahî Sûriyê, jinên siyasetmedar, Saziyên Rêveberiya Xweser, tevgerên jin, fermandar, pêkhate û bi sedan nûner û jinên pêşeng yên kurd di Sûriyê de, Yekemîn Konferansa Jinên kurd di bin dirûşmeya “Bi pêşengtiya jinên Kurd yekîtiya netewî ya kurd misoger bibe” li parka Azadî a bajarê Qamişlo hate lidarxistin.
Konferans bi pêşengtiya 5 jinên ku cihê xwe di dîwanê de girtine hate birêvebirin. Beriya ku bernameya konferansê were birêvebirin deqeyek rêzgirtin ji bo bîranîna hemû şehîdên doza azadiyê hat rawestandin.
Piştî wê rewşa siyasî a ku tê jiyankirin ji aliyê Rîhan Loqo ve hate xwendin. Her wiha nêrîn û nîqaşên jinan ji bo pêşeroja Sûriyê û pêşengtiya jina kurd hatin destpêkirin. Piştî wê belgeya konferansê ku tê de perensîpên giştî yên konferansa netewî ya jinên kurd di dawiyê de hate xwendin.
Rewşa jin di Sûriyê hate nîqaşkirin
Têkildarî konferansê endamê komîteya amedekar ya konferansê Ebîr Esaf ji rojnameya me re axivî û wiha got: “Ev
konferans li ser bingeha duyemîn konferansa ku li Başûrê Kurdistanê hatibû lidarxistin hatiye orgenîzekirin. Ew konferans bangawazî li hemû jinên kurd di Sûriyê de bi hemû rengên xwe hatibû kirin. Di hundir vê konferansê de rewşa siyasî a ku di Sûriyê de tê jiyan kirin, her wiha rewşa jin di Sûriyê û pêşeroja wê de çawa were birêxistinkirin wê bê nirxandin.”
300 jinên kurd hatin vexwendin
Ebîr da zanîn ku 300 jin hatine vexwendin û wiha got: “Îro ev konferans bi vexwendina 300 jinên kurd ku di giştî Sûriyê de xwe birêxistin kirine ji Şam, Heleb, Homs, Latqiyê û bajarên din, hat lidarxistin. Di demeke wiha de lidarxistina vê konferansê gelek girîng û xwedî wate ye. ku çawa jina kurd bibe pêşeng ji tavahî jinên Sûriyê û di cihê biryargirtina di pêşeroja Sûriyê de cihê xwe bigrin. Da ku Sûriyeke nenavendî û demokratîk were avakirin.”
Perensîpên giştî yên konferansa netewî ya jinên kurd ji van xalan pêk tên.
Yekîtî, nasname û çanda jina kurd, Netewa Demokratîk, perwerde û zanista jineolojî, hevjiyana azad, têkoşîna li dijî binpêkirinên mafê jinê, parastin û bergiriya destkeftiyên şoreşê, xweparastina jin a rewa, nirêxên şehîdên me yên yekîtiya netewî û niştîmanî, aboriya jin, pêşxistina dîplomasiya jin û encam
