Lîloz Hisên/Qamişlo
Komek ji çalakgerên Kurd li bajarê Qamişlo ji bo şermezarkirina “Danezana destûrî” ya desthilata Şamê meşekê ji pêş Stadyûma Şehîdên 12’ê Adarê li darxistin.
Bi dehan ji şêniyên bajarê Qamişlo bi armanca redkirina reşnivîsa destûrî ya desthilatdariya Şamê meşek li dar xistin. Di çalakiyê de alên Kurdisatanê û drûşmeyên “ Avakirina Sûriyeke demokratîk, pirrengî û nenavendî, Bêyî çareserkirina doza kurdî çareserî pêk nayê, û daxwazkirina misogerkirina mafê gelê kurd” hatin hildan.
Berî ku çalakî dest pê bike deqeyeke rêzgirtin ji bo giyanê şehîdan hate rawestandin, piştre bi navê çalakgirên bajarê Qamişlo, Amûdê û rêxistinên civaka sivîl axaftin hatin kirin.
Di axaftinan de komkujiya ku li gundê Berxbotanê ya başûrê bajarê Kobanê ji hêla dewleta Tirk a dagirker hate kirin hate şermezar kirin.
Di gotinan de reşnivîsa destûra nû hate şermezar kirin û wiha hate gotin: “Meha Adarê meha êş û berxwedaniye ji bo gelê kurd, me dixwest heman mehê bibe meha serkeftinê, lê dagîrkirin Kurdistanê komkujiyan li ser miletê me pêk tîne. Dewleta Tirk hem rêkeftina di navbera fermandar Mezlûm Ebdê û serokê Sûriyê yê demikî Ebû Muhmed El-Colanî pîroz dike, hem jî êriş û komkujiyan li ser gelê kurd pêk tîne. Divê tevgera siyasî bi hemû beşên xwe di nêzîktirîn demê de pîrozbahiyê bidin miletê xwe bi raghandina yekrêziya refa kurdî. Bi yekrêziyê em ê karibin destûra nû bighuerînin.
Di dawiya axaftinan de hate tekez kirin ku raghandina reşnivîsa destûra Sûriyê bi tu awayî nûnertiya gelê kurd nake û Sûriya nû bê mafê gelê kurd çareser nabe.
