Ayşa Silêman/ Dêrik
Derbarê 7’emîn salvegera dagirkirina herêma Efrînê de, Kombenda Efrîn a bajarê Dêrikê daxuyaniyek da. Kombenda Efrînê bang li tevahiya aliyên navneteweî kir ku bi erkê xwe rabin û pêşî li êrişên dagirkeriya Tirk bigrin.
Kombenda Efrîn a bajarê Dêrikê ji bo salvegera heftemîn a dagirkirina Efrînê, li pêşiya Meclisa Malbatên Şehîdan a bajarê Dêrikê daxuyaniyek da. Di daxuyaniyê de hemû endamên saziyên Rêveberiya Xweser hazir bûn.
Di destpêka daxuyaniyê de bal hat kişandin ser salvegera heftemîn a dagirkeriya Efrînê û wiha hat gotin: “Em hemû şehîdên doza azadiyê di şexsê Barîn, Evêsta, Karker, Rojhat û hemû şehîdên meha Adarê bibîr tînin. Herêma Efrînê bibû cihê ewle ji hemû gelên Sûriyê re yên ku ji şer û bindestiya rêjîma Baas reviyabûn. Herêma Efrînê rêveberiya Xwe ya Xweser ava kir bêyî ku ferq û cûdahiyê bike di nav bera netewan de û xwe li ser Netewa Demokrat a ku ji felsefeya Rêber Apo girtibû, da avakirin. Ev xeta gelê Efrînê hilbijartibûn li dijî zihniyeta dagirkeriya Tirk bû, ji ber vê yekê berê çeteyan da Efrînê û dest bi kuştin, talan û sûcên dij mirovî û hemû cûreyên teknîkê bikar anî, di nav wan de çekên qedexekirî jî hebû. Tevî berxwedaniya şervanan li dijî dagirkeriyê û çeteyên wê jî, lê gelê Efrînê neçar ma dev ji xaka xwe berdin û wek vê rojê berê xwe bidin Şehba. Lê tevî wê jî êrişên dagirkeriyê li ser Şehba bi dawî nebûn û gel di bin dorpêçkirina rêjîma Baas de bû.”
Di berdewamiya daxuyaniyê de wiha hat gotin: “Piştî ketina rêjîma Baas hemû koçber vegeriyan cih û warên xwe, lê gelê Efrînê ji şûna ku vegerin li ser xaka xwe careke din hatin koçberkirin. Dagirkeriya Tirk hemû hewildanên xwe dike da ku çeteyên xwe derbasî herêma Bakur û Rojhilatê Sûriyê bike û rojane êrişên dagirkeriyê berdewamin, weke êrişa li ser gundê Berxebotan a girêdayî bajarê Kobanê û di encamê de melbatek bi giştî şehîd bûn.”
Di dawiyê daxuyaniyê de wiha hat gotin: “Em wek gelê Efrînê di vê meha pîroz de bang li kongra dewletên Islamî, rêxistinên parastina zarokan û bi taybet em bang li hikumeta Şamê dikin û kar bike da ku rê li pêşiya van komkujiyên ku dagirkeriya Tirk li bendava Tişrînê û pira Qereqozaqê dike, bigre. Em bang li Netewên Yekbûyê dikin ku nehêlin balefirên dagirkeriya Tirk rabe ser herêmê û li dijî gel komkujiyan pêk bîne.”
