Ayşa Silêman/Dêrik
Îro bi boneya nêzîkbûna Cejina Newrozê Dibistana Hisnî Egîd a bajarê Dêrikê şahiyek li dar xist û bi pêxistina agirê Newrozê, cejina netewî ya gelê kurd hat pîrozkirin.
Bi boneya nêzîkbûna Cejina Newrozê Dibistana Hisnî Egîd a bajarê Dêrikê şahiyek li dar xist. Di şahiyê de malbatên zarokan, hemû rêveberên dibistanan û rêveberên saziyan amade bûn.
Şahî bi xuleyek bêdengiyê li ser giyanê şehîdan hat destpêkirin.
Paşê bi navê Rêveberiya Dibistana Hisnî Egîd, Diyala Mişo Cejina Newrozê li hemû kesên amade pîroz kir û wiha
got: “Moralê me û xwendekarên me gelekî bilind e ji bo pêşwaziya vê roja pîroz. Em bi hêvî ne Newroza 2025’an bibe Newroza azadî, aramî û serkeftinê. Herwiha bibe Newroza geşbûn û pêşketina zimanê dayîkê. Hestên me ji bo îsal hestên cûda ne ji ber ku em ber bi azadî û demokrasiyê ve diçin.”
Piştre komên zarokan dîlan gerandin, hem jî şano pêşkêş kirin û di dawiyê de jî agirê Newrozê pêxistin, di heman demê de bi heyecan û kêfxweşiyekê mamoste û xwendekaran li dora agir dîlan gerandin.
