Gundê Berxbotan piştî 10 salan careke din di komkujiyê re hat derbaskirin. Sala 2015’an DAIŞ’ê bi desteka dewleta Tirk 27 kes qetil kiribûn. 2025’an vê carê dewleta Tirk bi xwe êriş kir û malbatek tune kir.
Gundê Bexbotan 27 kîlometre dikeve başûr-rojavayê Kobanê. Li vî gundê ku 120 malbat lê hebûn şêniyan bi çandinî û sewalvaniyê debara xwe dikir. Gundiyan di nava aramî û hevkariyê de jiyan dikir, lê ji sala 2014’an ve bi êriş û hovîtiyên çeteyan û dewleta Tirk a dagirker re rû bi rû ma.
Çeteyên DAIŞ’ê piştî ku bajarê Mûsilê yê Iraqê sala 2014’an dagir kir, 15’ê Îlona 2014’an jî bi desteka dewleta Tirk û gelek welatên herêmê êrîşê herêma Kobanê kirin.
Çeteyên DAIŞ’ê piştî ku 350 gundên Kobanê ku Berxbotan jî di nav de ye dagir kirin, berê êrişên xwe dan navenda bajêr. Serokomarê dewleta Tirk Recep Tayip Erdogan ku wê demê serokwezîr bû, plana xwe eşkere dikir û digot; “Kobanê dikeve, wê bikeve”.
Dijî êrişan hêzên YPG-YPJ’ê berxwedana herî mezin a dîrokî nîşan da. Her wiha çar aliyên Kurdistanê rabû ser piyan, li derveyî welat jî şoreşger û parazvanên mafên mirovan bere xwe dan Kobanê. Di encama vê hevkariya dîrokî de 26’ê Çileya 2015’an navenda Kobanê ji çeteyan hat paqijkirin.
Ev bû ‘destpêka têkçûna’ DAIŞ’ê û piştevanên wê. Nexasim piştre tevahiya gundewarên bajar hatin paqijkirin.
Li Berxbotan komkujî
Piştî rizgarkirina bajar û gundewarên wê, hêzên YPG/YPJ’ê operasyonên xwe yên dijî DAIŞ’ê li Minbicê domandin. Di vê navberê de dewleta Tirk a dagirker û çeteyên wê DAIŞ ku têkçûn qebûl nekirin, 25’ê Hezîrana 2015’an bi rêbazên herî qirêj careke din êrişî navenda Kobanê kirin.
Destpêka êrişên wan jî gundê Berxbotan bû. Çeteyên hov li gund 27 kes qetil kirin. Her wiha li gundên Zerik û Girê Sêvê jî komkujî hat pêkanîn.
Çeteyan piştrî, bi cil û bergehên hêzên asayişa Kobanê êrişî navenda bajar kirin. Di van êrişan de bi giştî 272 kes hatin qetilkirin, bi sedan jî birîndar bûn. Bi destwerdana hêzên YPG/YPJ’ê tevahiya çeteyên êrişî bajar kiribûn, hatin cezakirin.
Piştî 10 salan vê carê dewleta tirk
Bi rizgarkirina herêmê re, şêniyên gundên Berxbotanê jî hewl dan birînên xwe derman bikin, jiyana xwe ji nû ve ava bikin. Lê piştî 10 salan vê carê dewleta Tirk bi xwe, bi rêbazên herî hovane yên dijî hemû pîvanên exlaqî û mirovî êrişî Berxbotan kir.
Di rojên ber bi Newrozê ve, di rojên ku ji bo Kurdan û gelên herêmê tên wateya rizgariya ji zulm û zodariyê de, êriş pêk hat. Şeva 17’ê Adarê saet 00.40’an ku her kes di xew de ye, balafira bêmirov û bi çek a dewleta dagirker, di navbera gundê Berxbotan û Qomiçî de malbatek bombebaran kir. Her wiha bi çekên giran jî topbaran kir.
Di encamê de ji malbatê dayik, bav û 7 zarokên wan hatin qetil kirin. Her wiha 2 zarok jî birîndar bûn.
