Dîlan Mulhim\ Qamişlo
Insiyatîfa Gel a Bajarê Qamişlo ji bo redkirina Destûra Sûriyê ya nû li ser asta kantona Cizîrê, li bajarê Qamişlo meşeke girseyî lidar xist.
Îro Insiyatîfa Gel a bajarê Qamişlo ji bo redkirina Destûra Sûriyê a nû, meşek li ser asta kantona Cizîrê li dar xist. Bi sedan welatî tevlî meşê bûn, herwiha meş ji dermanxaneya Deham destpêkir û heta navenda UN bi dawî bû.
Piştî ku meş veguherî mîtîngê deqeyek rêzgirtin li ser giyanê şehîdan hate rawestandin. Piştire hevserokê kantona Cizîrê Hesen Şero axivî û wiha got: “Gelên Bakur û Rojhilatê Sûriyê têkoşîneke mezin li
dijî Rêjîma Baas dan meşandin. Gelê kurd di şoreşê de li hemberî vê zordariyê serî hilda û kete nav raperînekê de, ev raperîn jî ji bo avakirina Sûriyeke Dîmokratîk bû. Ji bo hemû pêkhate cihê xwe lê bigirin têkoşîneke pir mezin dane meşandin. Lê mixabin berî çend rojan destûra Sûriyê hate ragihandin, mafê gelek pêkhateyan hate piştguhkirin. Gelê Sûriyê vê destûra ku mafê gelek pêkhateyan lê hate piştguhkirin tucarî qebûl nakin, herwiha di şoreşa Sûrî de destûreke bi vî rengî bi hişmendiya Rêjîma Baas gelê Sûriyê vê destûrê napejirîne.”
Li ser navê pêkhareya Ereb Ferhan Eltayî wiha axivî: “Em her dem dibêjin ku gelê Sûrî yeke, herwiha berî ku em bêjin kurd im, ezêdî û ereb im dibêjim em Sûrî ne. Me hêvî dikir ku berî ev destûra Sûrî ya nû derkeve ku
nakokiyên olî tune bin, kevneşopî û mafê jinê lê were parastin. Dema ku hevserokê Sûriya Dîmokratîk Mezlûm Ebdî û Ebû Mihmed Elcewlanî li hev civiyan em pir bi hêvî bûn ku rewşa Sûriyê aram bibe û aşitî li herêmê çêbibe, herwiha Sûriyeke dîmokratîk were avakirin. Desthiltdariya şamê rojane komkujiyan tîne li ser civaka Elewî bi hinceta ku gelê Elewî girêdayî Rejîma Baas e, helbet em vê yekê jî şermezar dikin. Em destûra Sûriyê ya ku hatî ragihandin ku mafê gelek netewan piştguh dike şermezardikin.”
