Ayşa Silêman/ Dêrik
Bi boneya salvegera serhildana 12’ê Adarê şêniyên bajarê Dêrikê di bin dirûşmeya “Şehîd Namirin û bi rihê berxwedana 12’ê Adarê em ê bi ser bikevin” meşeke girseyî li dar xistin.
Îro bi boneya salvegera Serhildana 12’ê Adarê şêniyên bajarê Dêrikê meşeke girseyî di bin dirûşmeya “Şehîd Namirin û bi rihê berxwedana 12’ê Adarê em ê bi ser bikevin”li dar xistin. Meş ji Qada Azadî hate destpêkirin û li pêş deriyê goristana şehîdan veguherî mîtîngê. Piştî ku meş veguherî mîtîngê kesên amade berxwedana ku di sala 2004’an hatî kirin bi rêzdarî bibîr anîn û xuleyek bêdengî li ser giyanê şehîdên 12’ê Adarê rawestiyan.
Piştre li ser navê Rêveberiya Xweser a bajrê Dêrikê Hesen Hemze bi xêrhatina dayik û bavên şehîdan kir û wiha got: “Rojek wiha ji bo kurdan rojeke dîrokî ye û herdû şehîdên bajarê Dêrikê bi serfirazî em wan bibîr tînin û bejna xwe li ber wan ditewînin.”
Di berdewamiya mêtîngê de li ser navê Rêveberiya Perwerdeya Dibistanan a bajarê Dêrikê Mihemed Hesen diyar kir ku ew şehîdên 12’ê Adarê bibîr tînin û bejna xwe li hemberî wan ditewînin.”
Di dawiya meşê de daxuyaniyeke nivîskî bi zimanê kurdî û erebî hate dayîn.
Daxuyanî wiha hate destpêkirin: “Îro 21’emîn salvegera serhildana Qamişlo ye. Di vê rojê de rêjîma Baasê xwest di navbera kurd û ereban nakokiyan derxe, lê dema Şoreşa Rojava dest pê kir hemû pêkhateyan cihê xwe di nav de girt û karîn bi rihê şoreşê li himber zordestî, kuştin û çewsandinê bisekinin. Ev serhildana ku 21 sal ji berxwedanê li du xwe hişt bi saya wê Rêveberiya Xweser hat ragihandin û bû sedema bilindkirina asta hevgirtina pêkhateyên Bakur û Rojhilatê Sûriyê û dawî li siyaseta fitne û nakokiyên mezhebî anî.
Daxuyanî wiha hate bidawîkirin: “Bi saya ked, berxwedanî û hevgirtina pêkhateyan di 10’ vê mehê de di navbera Hêzên Sûriya Demokratîk û desthilata nû ya Şamê de, piştî rûxandin rêjîma Baas, rêkeftinek pêk hat. Ji vê rêkeftinê em tekez dikin ku bi hemû şiyanên xwe em ê bikaribin Sûriyeke demokratîk, piralî û nenavendî avabikin.”
