Hemza Sêvo/ Qamişlo
Bi sedan şêniyên kantona Cizîrê Serhildana 12’ê Adarê li Stada Şehîdan a 12’ê Adarê bi bîr anîn. Herwiha derbarê heman mijarê Meclisa Bajarê Qamişlo daxuyaniyek da. Ji hêleke din ve bi navê Meclisa Malbatên Şehîdan, Rêzan Gulo got, “Rêjîma Beis!, tu têk çûyî û gelê Qamişlo ma.”
21 sal li ser Serhildana 12’ê Adarê derbas bûn, raperîna gelê kurd li dijî komkujiya ku rêjîmê piştî matça di navbera Tîma Cîhad û Fitiwê de li hemberî kurdan pêk anî.
Derbarê salvegera vê bûyerê jî Meclisa Bajarê Qamişlo li Stada Şehîdên 12’ê Adarê daxuyaniyek da.
Daxuyanî bi zimanê kurdî û erebî hat xwendin, bi sedan şêneyên kantona Cizîrê, rewşenbîr, partiyên siyasî, Meclisa Malbatên Şehîdan, nûnerên saziyên Rêveberiya Xweser, TEV-DEM û tevgerên jinan beşdar bûn.
Destpêka daxuyaniyê wiha bû: “Bi boneya salvegera komkojiya ku di 12 Adara 2004’an de ku ji hêla rêjîma Beis ve li ser gelê kurd pêk hat, em bi bîr tînin û bejna xwe li ber şehîdan ditewînin. Ew bûyer hat qewimandin bi destpêkirina maça futboolê di navbera Tîma Cîhad û Fitiwê de.”
Daxuyanî wiha hat qedandin: “Rêjîma Beis ya şofînist nerîna wê yê cûda hebûn û fitine xist navbera gelê Dêrazorê û kurdên Qamişlo. Wê dema maf dan alîgirên Tîma Fitiwê ku êrîşî gelê kurd bikin û gotinên ne ji rêzê bêjin, di encamê de 40 şehîd 200 birîndar û nêzî 2000 kurd hatin girtin piraniya şehîdan di bin işkenceyê şehîd bûn. Di dawî de em dibêjin na ji fitnê re na ji newekheviyê re bijî biratiya gelan.”
Piştî daxuyanî hat xwenedin, bi navê Meclisa Malbatên Şehîdan Rêzan Gulo wiha got: “Di serî de em bejina xwe li ber şehîdên Serhildana 12’ê Adarê ditewînin û sersaxiyê ji malbatên hemû şehîdên serhildanê dixwazin. Vê salê em vê rojê bêyî rêjîma Beisê bi bîr tînin û dibêjin“Ey rêjîma Beis, kanî tu, vaye tu têk çûye, lê Qamişlo û gelê Qamişlo maye û wê Qamişlo bimîne. Peymana ku Fermadariya Giştî ya QSD’ê bi serokê demkî yê Şamê re îmze kir, diyariyek ji bo giyanê şehîdan bû. Em ji hikumeta Şamê re dibêjin, eger tu ne li gorî daxwazên gelên Sûriyê û Rêveberiya Xweser tevbigere tu yê jî mîna rêjîma Beisê têk biçe. ”
Herî dawê hemû kesên amade ji Stada 12’ê Adarê ber bi gorstana Taxa Qidûrbeg ve çûn.
