Hemza Sêvo/ Qamişlo
Rojnamevan Zîlan Hemûş diyar kir ku bi dirêjahiya şoreşê û heya îro, gelê Eşrefiyê û Şêxmeqsûd rastî dorpêçê hatiye û got, “Civakê bi rihê Şerê Gelê Şoreşgerî li dijî rêjîmê û çeteyan li ber xwe daye. Wê tu kes nikaribe vîna gelê Şêxmeqsûd û Eşrefiyê bişkîne.”
Şêxmeqsûd û Eşrefiyê du taxên kurdan ên bajarê Helebê ne, dema ku Şoreşa Rojava dest pê kiriye xelkên her du taxan rastî zextên rêjîm û komên çete hatine.
Derbarê rewşa xelkên Şêxmeqsûd û Eşrefiyê, zexta ku dibînin hem jî li hemberî wê berxwedaniya civakê, rojnamevan Zîlan Hemûş ku li Şêxmeqsûd dijî ji rojnameya me re axivî.
‘Ji destpêka şoreşê ve Şêxmeqsûd û Eşrefiyê rastî zextê dihatin’
Zîlan da zanîn ku ji destpêka şoreşê ve rêjîmê û komên çete zext li welatiyên Şêxmeqsûd û Eşerefiyê kirin û wiha got: “Dema ku behsa Taxa Şêxmeqsûd û Eşrefiyê tê kirin, kelha berxwedaniya bi salan dikeve hizra me. Wekî em dizanin ku ji destpêka Şoreşa Rojava ve heta roja îro herdu taxên kurdan; Eşrefiyê û Şêxmeqsûd rastî êriş, şerê taybet, zext, ambargo û astengiyan ji derdor ve hatine. Di sala 2013’an de komên çete êrişî her du taxan kir, di wê demê de welatiyên Eşrefiyê û Şêxmeqsûd koçber nebûn, bi awayê Şerê Gelê Şoreşgerî bersiva êrişan dan. Herwiha sala 2016’an dîsa 28 tabûr çeteyan ji hemû aliyan ve êrişî gelê Şêxmeqsûd û Eşrefiyê kirin. Di wê demê de civakê ji hêla leşkerî, parastina cewherî, siyasî, aborî û hwd… xwe bi rêxistin kirin û li taxên xwe berxwedaniyeke dîrokî kirin. Dema ku Efrîn hat dagirikin, beşek ji xelkên wê derbasî Helebê bûn û hin jî li Şehbayê man, di wê demê de tevahiya Helebê di destê rêjîmê de bû, ji bilî Eşrefiyê û Şêxmeqsûd. Lewma jî ambargoyeke mezin û giran ji hêla rêjîma Beisê ve li ser gelê kurd ên her du taxan dihat meşandin.”
‘Bi guhertina rêjîmê re tiştek nehat guhertin’
Zîlan Hemûş diyar ki ku bi ketina rêjîma Beis re tiştek nehate guhertin, ji ber ku her du bi yek hişmendiyê ne û
wiha domand: “Rêjîmê bi siyaseta dorpêçiyê û qutkirina jêderên jiyankikirinê li ser gelên me xwest ku vîn û berxwedaniya civakê bişkîne û gel xwe teslîm bike. Lê di wan şert û mercên de yên ku gel tê re derbas dibû, berxwedaniyeke bêhempa hat meşandin. Bi taybet di mehên zivistanî de, gel ji debarên jiyanê, wekî sotemenî, xwarin, vexwarin, şîrê zarokan bêpar bûn, ev pirsgirêk jî her sal dubare dibûn. Rêjîma Beis, li dijî debarên jiyana gel disekinî, lê gelê me li hemberî vê yekê, li ber xwe dida. Piştî ewqas berxwedanî, rêjîm hilweşiya, rêjîm hat guhertin, Essed çû Ebû Mihemed Elcolanî hat, lê tiştek nehat guhertin. Ji ber ku niha hewldan hene ku komên çete weke Emşat û Hemzat bikevin Taxa Şêxmeqsûd û Eşrefiyê bikin û bixin bin kontrola xwe. Lê gelên me li gel hêza xwe, berxwedaniyek dan meşandin, parastina taxên xwe kirin û karîbûn vê êirşê vala derxînin. Sedem ew e ku bi ketina rêjîmê re civakê li her du taxan ketine seferberiyê û rewşa ewarte ragihandine, civak xwe ji hemû waran ve xwe bi rêxistin kir û piştgiriya hêza parastinê dike.”
‘Tax taxên me ne, çi dibe bila bibe em dernakevin’
Rojnamevan Zîlan Hemûş destnîşan kir ku Eşrefiyê û Şêxmeqsûd taxên kurdan in, wê li nik hêza xwe parastina axa xwe bikin û wiha axivî: “Bi dirêjahiya deh salên bûrî re çeteyan xwestin bikevin taxên me, hewl didan mîna kiriyarên li ser gelê Efrînê dan meşandin, li Eşrefiyê û Şêxmeqsûdê dubare bikin. Îroj heman yekê dixwazin, dewleta Tirk û çeteyên girêdayî wê dixwazin mîna Efrînê dagir bikin û kiriyarên xirab pêk bînin. Berî demekê me dît ku dewleta Tirk a dagirker êrişî bendeke kontrola Hêzên Ewlekariyê ya Eşrefiyê kir û di encamê de du endamên Asyîşê şehîd bûn û hinek din birîndar bûn. Tu kes nikare vîna gelê Eşrefiyê û Şêxmeqsûdê bişkîne. Îro gelê me biriyar daye li gel hêza xwe ji bo parastina taxên xwe bike. Ev tax taxên me ne, çi dibe bila bibe em ê li ser erda xwe bijîn û bi çi awayî be em ê ji taxên xwe dernekivin. ”
