Navenda Nûçeyan
Tevahiya şêneyên Qamişlo bi pêşengiya jinan û bi durşmeya “Bi Felsefeya Jin Jiyan Azadî Ber Bi Sûriyeke Demokrat Ve” Roja Jinên Kedkar ên Cîhanî pîroz kirin.
Îro hemû jinên bajarê Qamişlo û pêkhateyên wê bi armanca pîrozkirina Cejin 8’ê Adarê, Roja Jinên Kedkar ên Cîhanî şahiyek li qada gundê Hîmo li dar xistin.
Berî ku şahî dest pê bike peyama Rêber Apo ya ji bo jinên azadîxwaz hat xwendin û hemû kes tevlî xuleya rêzgirtinê bûn, paşê şahî dest pê kir.
Di serî de bi navê Kongra Star Elîfa Hemo wiha got:“Em Roja 8’ê Adarê li avakerê azadiyê Rêberê Navnetewî Abdullah Ocalan pîroz dikin. Ev roj, roja azadî, têkoşîn û berxwedaniya jinên cîhanî ye. Rêber Apo manifistoya azadiyê diyarî me kiriye, em ê jî weke Kongreya Star û hemû jinên Bakur û Rojhilatê Sûriyê vê projeyê bi fikrên azad tacîdar bikin. Her roj dewleta Tirk a dagirker êrişî çiyayên Kurdistanê, Bendava Tişrînê û Pira Qereqozaqê dike, lê sekn û berxwedaniya jinan, civaka şoreşgerî û şervanan li hemberî dagirkeriyê bersiveke herî bihêz e.”
Herwiha bi navê Meclisa Jinên Sûriyê, Mûna Yûsiv Roja Jinê pîroz kir û wisa anî ser ziman: “Jin di roja îro de bi vîn, xebat û sekina xwe li Bakur û Rojhilatê Sûriyê tekez dikin ku cihê xwe di hemû waran de girtine û dikarin bibin xwedî rol ji bo rêvebirina civakê. Lê îroj gelek alî dixwazin jinan di siberoja Sûriyê de bêbandor bikin û hem jî paşguh bikin. Lewma jî divê hemû jin bi vîna xwe têkoşînê bikin da ku cihê xwe di destûra Sûriyeke nû de bigirin.”
Piştî wê, bi navê Yekîtiya Jinên Suriyan, Semîra Hena bi zimanê suryanî Roja Jinê pîroz kir.
Herwiha peyamek ji Şandeya Jinên Elmanî ji bo pîrozbahiya cejina jinên Bakur û Rojhilatê Sûryê hate xwend.
Şahî bi stran û govendên hunerî yên Koma Yasna, Delîla û Hêva hat coşedan.
Herî dawî şahî bi dîlanên geş, dengê tilîlî û siloganên bilind weke Jin Jiyan Azadî, bijî Rêber Apo, azadî ji bo Rêberê netewî bi dawî bû.
