Asya Weşûkanî
Dema li ser înîsiyatîfa Rêber Apo dihizirim, dikevim nav lêhûrbûnên pir kûr. Ji ber helwesta dewleta Tirk têrker nîne û hîna jî gelê Tirk Rêber Apo baş fêm nekiriye. Ev jî berhema hişmendiya rayedarên Tirk a 200 salî ye.
Zehmet e jî hema wiha di demeke kurt de gelê Tirk îqna bibe. Lê ya girîng jî ew e guftûgo her hebin û diyalog berdewam bikin. Rewşenbîr, zanyar, hiqûqnas û aqilmend divê bikevin nav hewldanan. Dibe ku bi vî awayî bi rêya diyalogan gelê Tirk jî haj li rastiyê bibe û têkeve nava hewldana çareseriyê.
Eger gelê Tirk haj li rastiyên dîrokî bibe, texmîn nakim rêya çareseriyê hilnebijêrin. Bêguman hinek dem pêwîst e, lê hewce ye di vê demê de deverên pêwendîdar derfetan bidin Rêber Apo da ku bi gel re diyalogan berdewam bike.
Pêwîst e civaka Tirk rastiya kesayeta Rêber Abdulah Ocalan nas bike. Ev jî erka rayedarên Tirk, rewşenbîr, hiqûqnas û aqilmendan e. Bi salan e Rêber Apo qala aştiyê, bêdengkirina çekan dike. Lê mixabin dewleta Tirk her hewl dida dengê Rêber Apo bibire û tecrîda 26 salan jî li ser esasê vê siyasetê tê meşandin. Niha em dibînin ku Devlet Bahçelî înîsiyatîfa xwe bi kar anî û bang li Rêberê gelê Kurd kir ku çek rawestin.
Rêber Apo jî weke her carê bersivek erênî da, bang li Tevgera Azadiyê kir ku xwe ji berdana çekan re hazir bike. Wê di demên pêş de diyar bibe bê ka alî çiqasî hazir in ku çareseriyê pêk bînin. Divê em jî tev ji vê gava dîrokî re amade bin.
Jixwe nameya Rêber Apo ji bo Bakur û Rojhilatê Sûriyeyê jî hebû û em tevahî jî meraq dikin bê ka zanyar û pêşengê me Rêber Apo ji bo me wê çi biryarê bide. Em jî bê pirs û bersiv jêre amade ne.
