Esma Mistefa/ Qamişlo
Hevserokê Desteya Çand û Hunerê a Bakur û Rojhilatê Sûriyê Murhef Bedir diyar kir ku di berhemên wan yên hunerî yên dawî hemû pêkhateyên Sûriyê beşdar bûn û wiha got:: “Armanca me hevgirtina gelan e.”
Desteya Çand û Hunerê li Bakur û Rojhilatê Sûriyê bi xebatên hunerî gelek gavên bi bandor avêtin. Herî dawî bi gelek pêkhateyên Sûriyê re kilîp û xebatên hunerî hatin amedekirin. Têkildarî van berheman Hevserokê Desteya Çand û Hunerê a Bakur û Rojhilatê Sûriyê Murhef Bedir ji rojnameya me re axivî.
Bi hunerê peyamên aşîtiyê
Murhef di destpêkê de bal kişand ser girîngiya xebatên hunerî û çandî û wiha got: “Bê guman gelê Sûriyê di
kirîza ku zêdetirî 14 salan dewam kiriye û hê jî didome, gelek êş û zehmetiyên ku nayên bilêvkirin kişandin. Helbet rola hunerê jî gelekî girînge. Bi xebatên hunerî em dikarin peyamên aşîtiyê û hezkirinê di nava civakên Sûriyê de bidin belavkirin. Çêkirina berhemên hunerî alîkarî û kurtkirina gelek peyamên aştiyê di nav gelê Sûriyê de ye. ji bo derbaskirina serdemên şerên ku Sûriyê di heyama borî de derbas kiriye her wiha ji bo ku diyaloga siyasî ku bibe bingeha avakirina Sûriyeke demokratîk.”
Sûriye bixemilîn in
Herwiha Murhef têkildarî naveroka her du berheman yên bi navê “Sûriyê bixemilîn in û çand û dîroka herêmê” de wiha got: “Bi taybet di vê pêvajoyê de li ser asta Sûriyê ji aliyê Desteya Çand û Hunera Bakur û Rojhilatê Sûriyê ve, du stran hatin amadekirin, ya yekem bi navê Sûriyê Bixemilînin e, ku armanca wê ew e ku hemû ziman û zaravayên ku li Sûriyê tên axaftin, weke ku di şahiya dawîbûna rewşa şer a piştî rûxandina rêjîma dîktator û vegera Sûriyê ya li ser bingeha hezkirin û hevrêziyê bigihîne hev.
`Çand û dîroka herêmê`
Di strana duyemîn de jî folklora çandî û dîroka herêmê bi peyvên folklorîk û xêzkirina şûnwarên arkeolojîk dinirxîne. Helbet ev stran ji aliyê Desteya Çandê ya Bakur û Rojhilatê Sûriyê û li Studyoya Şehîd Walat de hatiye amadekirin. Di vê klîpî de me xwest em zêdetir bal bikşînin ser çanda herêmê, her wiha ji ber zengînbûna herêmê û Sûriyê di aliyê dîrokî de, me xwest vê yekê bi awayekî hunerî li cihên dîrokî derxînin pêş.”
Armanc bedewî, cihêregî û hevgirtina gelan e
Murhef bal kişand ser beşdarbûna hemû pêkhateyan di van berheman de û axaftina xwe wiha qedand: “Hemû pêkhateyên Bakur û Rojhilatê Sûriyê beşdarî van stranan bûn û birrengiya ziman derket pêş pêkhateyên ku tê de beşdar bûne wiha bûn (erebî, kurdî, suryanî, ermenî, suweyda, Helebê û hemû deverên din). Di riya vê kilîpê re hevgirtina pêkhateyan hatiye raberkirin. Helbet ev yek jî nîşaneya pirrengiya çandan, ziman û mozaîka xweşik ya di Sûriyê de xwe parastiye. Em jî bi riya van berheman vê xweşikbûnê derxînin pêş. Armanca vê beşdariya berfireh ew e ku bedewiya Sûriyê, cihêrengî û hevgirtina wê derbixe holê û aliyên çandî û dîrokî yên hemû pêkhateyên herêmê ragihîn.”
