Navenda Nûçeyan
Parêzer Georges Henri Beauthier êrîşên Dewleta Tirk ên li ser rojava û başûrê Kurdistanê şermezar kir û got: “Divê Dewleta Tirk ji ber komkojiyên xwe di asta navneteweyî de bê darzandin.”
Êrîşên Dewleta Tirk ên li ser Bakur û Rojhilatê Sûriyeyê û başûrê Kurdistanê dewam dikin. Di nava 6 mehên derbasbûyî de 6 rojnamegerên kurd bi Balafirên Bêmirov ên bombebarkirî yên Dewleta Tirk hatin şehîdxistin.
Herwiha êrîşên çeteyên Dewleta Tirk ên li ser Bendava Tişrînê dewam dikin û di van êrîşan de gelek sivîl hatin şehîdxistin. Parêzer Georges Henri Beauthier li ser komkujiyên ku Dewleta Tirk bi rêya SÎHAyan dike ji ANF’ê re axivî.
Beauthier bi bîr xist ku ji bo êrîşên Dewleta Tirk ên bi SÎHAyên li ser başûrê Kurdistanê lêkolîn bike çû Şengal û Mexmûrê û got: “Gelekî zehmet e ku sivîl li ber çavên cîhanê bên kuştin. Êzidî hewl didin li herêmê jiyaneke asayî ava bike. Min serdana navendeke çandê ya li Şengalê kir. Dewleta Tirk êrîş bir ser Pirtûkxaneya Şengalê û zarokeke şehîd xist.”
Parêzer Geogrges Beauthier hişyarî da ku bûyerên li Şengalê qewimî dikare bibe modêleke ku dewletên êrîşkar bi kar bînin û wiha dirêjî da axaftina xwe: “Pirsgirêk ne tenê li nava xaka Tirkiyeyê ye, li Iraqê herî kêm 10 baregehên dironan ên Dewleta Tirk hene. Me xwest lêpirsînê dewam bikin, lê belê yên ku dewam kirin hatin kuştin. 6 rojnamegerên li bakurê Iraqê, Mexmûr û Şengalê bûyer lêkolîn dikirin, hatin kuştin, saziyên navneteweyî ji bo belgekirina vê rewşê raporek jî nexwestin. Divê ev mijar di asta navneteweyî de bê nîqaşkirin.”
Geogrges Beauthier işaret bi gotinên ‘terorê’ yên Dewleta Tirk kir û anî ziman ku êzidiyan heta niha tu êrîşeke terorê nekirine, berevajî vê yekê li hemberî DAIŞ’ê şer kirine û wiha dawî li axaftina xwe anî: “Dewleta Tirk polîtîkayeke tunekirinê ya bi rêk û pêk dimeşîne. Neteweyên Yekbûyî êrîşa dronên Dewleta Tirk a li nava xaka welatekî din nabîne.”
