Meclisa Ragihandinê ya TEV-DEM’ê dewleta Tirk ji ragihandina azad ditirse. Meclisê ji bo şopandin û nirxandina sûcên dewleta dagirker xwest komîteyeke serbixwe ya lêkolînkirina rastiyan bê avakirin.
Meclisa Ragihandinê ya Tevgera Civaka Demokratîk (TEV-DEM) der barê êrişên dewleta Tirk a dagirker ên li ser rojnamevanan de daxuyaniyek nivîskî weşand.
Meclisa Ragihandinê ya TEV-DEM’ê bal kişand ser sûc û êrişên dewleta Tirk a dagirker ên li dijî Herêma Bakur û Rojhilatê û diyar kir ku rojnamevanên herêmê çav û şahîdên sûcên dewleta Tirk a faşîst in.
Di daxuyaniiyê de hate gotin “Rojnamevan bi kamera û raporên xwe derew û îdiayên şerê dirûnî yên ku dewleta Tirk a dagirker dide meşandin, radixin ber çavan. Rojnamevan her wiha berxwedana efsanewî ya QSD’ê û îradeya xurt a gelê Bakur û Rojhilatê Sûriyeyê û girêdana gel bi destkeftiyên xwe radighînin. Ji ber vê yekê dibin hedefa dewleta Tirk a faşîst a ku tevahî qanûnên navneteweyî binpê dike.”
Di dewam daxuyaniyê de hat bibîrxistin ku ji destpêka şerê li Bendava Şehîdan (Tişrînê) ve gelek rojnamevan bûn hedefa rasterast a dewleta Tirk a dagirker û ev tişt hat gotin “Rojnamevan Cîhan Bîlgîn Nazim Daştan li ser rêya Bendava Tişrînê û bajarê Sirînê yê Kobanê di êrişa dewleta Tirk a dagirker de şehîd bûn. Duh jî (15’ê Sibata 2025’an) rojnamevan ê ji bajarê Efrîna dagirkirî Egîd Roj li Bendava Berxwedanê (Bendava Tişrînê) ji aliyê dewleta Tirk a dagirker ve şehîd bû. Ev jî careke din tirsa dewleta Tirk faşîst ji ragihandina azad a ku hovîtiya wê aşkera dike, nîşan dide. ”
Di daxuyaniyê de soza şopandina şehîdên xeta ragihandina azad hate dayîn û bêdengiya hêzên nanveteweyî ya li êrişên dewleta Tirk a dagirker jî hat şermezarkirin. Hate gotin, bêdengî dewleta Tirk teşwîq dike ku hîn zêdetir sûcan bike.
Di dawiya daxuyaniyê de bang li saziyên hiqûqî, mirovî û yên Neteweyên Yekbûyî hate kirin ji bo şopandin û nirxandina sûcên dewleta Tirk a dagirker ên li dijî gelê herêmê û hedefgirtina rojnamevanan komîteyeke serbixwe ava bikin.
