Navenda Nûçeyan
Rêveberiya Xweser diyar kir ku komîteya amadekar a ‘Kongreya Diyaloga Nîştimanî’ ya ji aliyê desthilata Şamê ve hatiye avakirin, nûnertiya tevahî gelê Sûriyeyê nake.
Rêveberiya Xweseriya Demokratîk a Herêma Bakur û Rojhilatê Sûriyeyê têkildarî komîteya amadekar a “Kongreya Diyaloga Nîştimanî” ya ji aliyê desthilata Şamê ve hatiye avakirin, daxuyaniyek weşand.
Rêveberiya Xweser di destpêka daxuyaniyê de diyar kir ku bi hilweşîna rejîma Baasê û despotîzmê re hêviyên gelê Sûriyeyê yên pêkanîna daxwazên xwe yên avakirina siberojeke demokratîk nû bûn.
Rêveberiya Xweser destnîşan kir ku komîteya amadekar ya “Kongreya Diyaloga Nîştimanî” ya Sûriyeyê pîvanên yekalîbûnê nîşan dide û wiha got: “Ev nêzîkatiya şaş encamên nirxandina şaş a rewşa Sûriyeyê ye. Înkarkirin û paşguhkirina ku komîteyê esas girtiye, metirsiyên ku Sûriyeyê ber bi pergala navendî ya berê ve vegerîne, çêdike. Em vê rewşê hêvî nakin û ji bo Bakur û Rojhilatê Sûriyeyê jî naxwazin.”
Di dewama daxuyaniyê de hat gotin: “Pêdiviya me bi nûnertiyeke rasteqîn a bêyî dûrxistinê ji bo tevahiya sûriyeyiyan heye. Herwiha pêdiviya me bi pêşketineke zelal a pîvanên yekitî û hevkariya nîştimanî ya Sûriyeyê heye. Divê bi rêya beşdariya çalak û demokrat a tevahî tevgerên siyasî, sivîl û jinan pêdiviyên pêvajoya derbasbûnê li ber çavan bên girtin. Nabe îrade û biryara nêzî nîv milyon sûriyeyiyên li herêma me were paşguhkirin.”
Rêveberiya Xweser daxuyand ku komîteya amadekar a nûnertiya tevahî gelê Sûriyeyê nake û hêviyên tevahî pêkhateyên wê bi cih nayne. Herwiha diyar kir ku bi dûrxistin û paşguhkirina aliyekî ne mimkin e diyalog pêk were.
Rêveberiya Xweser îşaret bi vê yekê ki: “Ev dûrxistin destpêka siyaseta paşguhkirinê ye ku dê qet ji aliyê sûriyeyiyan ve neyê qebûlkirin. Em teqez dikin û bang li kesên Sûriyeke yekbûyî û bihêz dixwazin dikin ku bêyî înkar an paşguhkirinê rewşa Sûriyeyê baş bixwînin. Hêza welatê me Sûriyeyê di yekitî, hevgirtin û çarenûsa wê ya hevbeş de heye. Ev jî mîsogeriya rasteqîn a siberoja demokratîk e ku layîqî reseniya gelê Sûriyeyê û fedakariyên zarokên wê be.”
