Hemza Sêvo/ Qamişlo
Insiyatîfa Sûrî Ya Azadiya Rêber Abdullah Ocalan têkildarî Komploya Navneteweyî ya li dijî Rêberê Apo daxuyaniyek li Navenda Çand û Hunerê ya Mihemed Şêxo da. Insiyatîfê komplo şermezar kir û tevahiya gel vexwend mîtînga girseyî ya ku wê di 15’ê Sibatê de li Stada 12’ê Adarê were lidarxistin.
Ji bo şermezarkirina komplo, tecrîd, sîstema îşkence û qirkirinê, Insiyatîfa Sûrî Ya Azadiya Rêber Abdullah Ocalan daxuyaniyek li Navenda Mihemed Şêxo ya bajarê Qamişlo da.
Insiyatîfê daxuyaniya xwe bi zimanê kurdî û erebî xwendin û bi beşdarbûna hemû nûnerên saziyên Rêveberiya Xweser û Meclisa Malbatên Şehîdan, TEV-DEM, rêxistinên jinan hat dayîn.
Di destpêka daxuyaniyê de insiyatîfê bal kişand li ser 26’emîn Komploya Navnetewî, pê re jî polîtîkayên dewleta Tirk hem jî lîstikên wê û got, “ Em dibin şahidê bîst û şeşemîn salvegera Komploya Navneteweyî ya ku li ser Rêber Abdullah Ocalan pêk hat. Di merheleya 26’emîn Komploya Navnetewî de, em ketine qonaxeke hestiyar ku herêma me tê de ye û bi guhertinên herêmî yên girîng ve girêdayî ye. Bi taybet doza Rêber Abdullah Ocalan ne tenê dozeke kesekî ye. Komploya li dijî Reber Abdulah Ocalan komploya herî hovane ya navneteweyî ye ku li dijî wî pêk hat. Ev doza sedsalê ye ku em bi nav dikin , doza tevahiya gelan û gele kurd e, doza azadî, rûmet, nasname, edalet û wekheviyê ye. Di vê rojê de em destnîşan dikin ku polîtîkayên dewleta Tirk ên li dijî Rêber Abdullah Ocalan, ji bilî berdewamiya nêzîkatiyên qirkirina gelê kurd tistek nîne. Pêwîste em hemû pekhate li hemberî van polîtîkayên bêhiqûqî li ber xwe bidin û bi hemû derfetên xwe destekê bidin berxwedana Îmraliyê.”
Di berdewamiya daxuyaniyê de insiyatîfê wiha anî ser ziman: “Ji bo şermezarkirina Komploya Navneteweyî ya ku li dijî Rêber Abdullah Ocalan hatiye kirin û jinûvekirina soza me ya ji bo bidawîkirina tecrîda fizîkî ya li ser Rêbertî û azadiya wî were pêkanîn, wê roja şemiyê di saet 12.00’an de Stada Şehîdan 12’ê Adarê mîtîng were lidarxistin. Em dîsa tekez dikin ku Rêber Abdullah Ocalan bi fikir, felsefe û nêrîna xwe ya kûr, ne tenê ji bo doza kurdî ye, lê belê ji bo hemû doz û pirsgirêkên heyî yên li herêma Rojhilata Navîn kilîta çareseriya siyasî û aştiyane ye.”
Herî dawî Insiyatîfa Sûrî Ya Azadiya Rêber Abdullah Ocalan wiha bang kir: “Pêwîste komploger ên ku dixwestin bi roja 15’ê Sibatê rojeke biafrînin û bikin roja qirkirina gelê kurd, bizanibin wê bi îrade û têkoşîna me veguhere roja azadî û rûmetê.Li ser vê yekê em bang li gelê xwe bi hemû pêkhate û komen cuda yên weke rewşenbîr, rûspî, niviskar, şêx, mele, parêzer , endezyar, karker , mamoste, ciwan, jin û hemû meclis, dezgeh û desteyên Rêveberiya Xweser dikin ku derkevin qadan û bi xurtî û bi bandor beşdarî meşa girseyî bibin.”
