Birûc Resûl/Qamişlo
Li Bendava Şehîdan, çalakiyên gelê berxwedêr yên Bakur û Rojhilatê Sûriyê bi coş, kelecan û soza serkeftinê berdewam dikin?.
Li Bendava Tişrînê berxwedaniyekî bêhempa ji aliyê gelên Bakur û Rojhilatê Sûriyê ve tê meşandin. Her wiha gelê Bakur û Rojhilatê Sûriyê li Bendava Bexwedanê ya Tişrînê nobeta parastinê digrin, bi hêz û vîneke pir mezin gel berxwedana xwe didomîne. Li bendavê ji derketina rojê û heyanî êvarî gel di nava çalakî, têkoşîn û berxwedanêdeye û bi coş û kelecan welatî tevlî berxwedanê dibin û ji derketina rojê heyanî êvarî li ser piyane.
Di saat 6`ê seharê û bi derketina rojê re, gelê ku li bendava Tişrîn nobeta parastinê dikin ji xew şiyar dibin û roja xwe bi paqijkirina derdorê re destpêdikin. Her kes bi rihekî komînal û berpirsyar tevdigere. Beşek ji welatiyan paqijyê dikin û beşê din jî xwarina taştê amede dikin.
Piştre nêzî saat 8`an gel dest bi çalakiyên xwe yên cur bi cur dikin. Her wiha gel li qada bendavê li hev kom dibin û bi siloxan, daxuyanî û axaftinên ku têne kirin nerazîbûna xwe li hemberî êrişên dagirkeriya Tirk yên ku li ser welatiyan û li ser bendavê têne kirin şermezar dikin. Di heman demê de bi coş û kelecaneke mezin govend û dîlan tê gerandin.
Belê gelê Bakur û Rojhilatê Sûriyê li bendava berxwedanê ya Tişrînê her bi duruşmeyên‘Bendava Şehîdan emê bi canê xwe te biparêzin û bijî berxwedana şerê gelê şoreşgerî û bijî berxwedane şervanên QSD`ê’ bi qêrîn û tilîliyên dayikan her dem têne berz kirin.
Gelê Bakur û Rojhilatê Sûriyê nobeta parastina bendava Tişrînê dikin û bi rihê xwe berpirsyartiya xweparastina bendavê girtiye ser milê xwe. Angu em dikarin bidin destnîşan kirin ku gel bi tevlîbûna xwe ji berxwedaniyê re piştgiriya xwe ji şervanên QSD`ê û sekna xwe ya bi biryar li hemberî hemû êriş û gefên dagirkeirya tirk êşkere kir.
Rojane êriş bi belaferên şer û keşfê li ser bendavê û pira qereqozaqê têne kirin, ev êrîş dibin sersebebê ku heyanî neha di encama van êrîşan de gelek welatî şehîd ketine û gelek birîndar jî çêbûne û ji bo jiyanê zerarên mezin bi xwe de tîne û eletrîk li kantona Firatê bi giştî hatiye qut kirin, lê rûxmî vê yekê jî gel bi hemû hêz û îradeye xwe berxwedaniya xwe dewam dike.
Hemû pêkhateyên Bakur û Rojhilatê Sûriyê cihê xwe di nava berxwedaniya bendava Şehîdan de digrin û ji bona parastina çavkaniyên jiyan xwe di nava têkoşînê de ne. Rojane dagirkeriya tirk êrîşî bendavê dike û rojane birîndar û şehîd hene, lê gel bi wêrekiyeke mezin li ber xwe dide û gav paşve navêje û bi vîna xwe bibiryare ku destkeftî û çavkaniyên xwe yên jiyanê biparêze. Dema ku dibe êvar jî welatî hemû li qada bendavê li dora air kom dibin û bi awaz, stran û govend gerandinê coş, kelecan û biryardariya xwe ji bona berdewamkirina berxwedanê ji cîhanê re didin raber û soza ku wê bendavê biparêzin didin ker kesî.
