Ayşa Silêman/ Qamişlo
Wênesaza jin Nûrhîn El-Hisên diyar kir ku wênesazî cîhaneke cûdaye ku ji zarokatiyê ve bi wê re mezin bûye. Tabloyan xêz dike bi armanca ravekirina êş û azarên gelê xwe.
Nûrhîn El-Hisên di sala 1999’an de li bajarê Serêkaniyê ji dayik bûye. Wê zarokatiya xwe li bajarê xwe derbas kiriye lê ji destpêka kirîza Sûrî ve hemû bîranînên xwe li şûn xwe hiştin û berê xwe dan bajarê Qamişlo. Her wiha ev nîzî 6 mehên wê ye ku li Holenda dijî.
Di derbarê jiyan, kar û xebatên wênesaza jin Nûrhîn El- Hisên ji Rojnameya me re axivî.
Kar û xebatên Nûrîn El-Hisên
Nûrhîn El-Hisên da zanîn ku wê ji zarokatiya xwe ve ji wênesaziyê hez dikir û hertim ji bo xwe tablo xêzdikirin û
wiha got: “Ji ber şert û mercên jiyanê derfet nebû ku ez xwendina xwe berdewam bikim, lewma min biryar da ku ez dest bi karê wênesaziyê bikim. Malbata min û hevalên min hertim destek û hêviyê didan min da ku ez vê riyê berdewam bikim. Min di sala 2016’an de li peymangiha wênesaziyê dest bi pêşxistina xwe kir, ez li Enstîtoya Hunerê ya Malva mamosteya xêzkirinê bûm. Her wiha rahênera xêzkirinê li Hîlala Zêrîn jî bûm. Di heman demê de ez di hundir û derveyê Rojava beşdarî 26 pêşengehan bûm; li Helebce, Silêmaniyê, Heftemîn Festîvala Wêje û Hunerê ya Jinan li Qamîşlo, Şeşemîn Forima Rojava ya Hunerên Bedew li Qamişlo, Sempozyûm di qatekê de, Sempozyûm li Kobanî, festîvala Perçem li Kobanê, Xecxecok Qamişlo û Pêşengeheke hunera plastîk bi navê “Şehîd Xalid” bûme. Heya roja îro ez rastî wan astengiyên giran nehatime ji ber ku ev riya ku min hilbijartî bi xwesteka min e û gava tiştek bi xwesteka mirov bê, wê helbet hemû hêza xwe bikar bîne.”
‘Huner jiyaneke xwezayî ye’
Wênesaza jin Nûrhîn El-Hisên axaftinên xwe bidawî kir û wiha got: “Huner jiyaneke xwezayî ye, ez hemû hestên xwe têde derdixim holê û dema ku ez xêz dikim hertim hîs dikim ku li cîhaneke cûda me. Hertim ez dixwazim bi riya firçe û rengan hunera kurdî ronî bikim. Tabloyên min herî zêde neyênika kurdayetiyê îfade dike wek; Dayîkên şehîdan, Leșkerên kurd û Jina bi hêz li Rojavayê Kurdistanê. Hêviya min ewe ku di demên pêş de tabloyên xwe li tevahî Ewrûpayê nîşan bidim û bi tabloyên xwe yên kurdî û navê xwe bêm naskirin. Banga min ji hemû jinan re ew e ku ji talenta xwe sûd werbigirin, hebûna civaka xwe biparêzin û xwe pêş bixin. Da ku xewnên xwe bi cih bînin û di heman demê de ji bona parastina şaristanî û hebûna civakê.
