Navenda Nûçeya
YRD’ê diyar kir ku 27’ê Çileyê dewleta Tirk bi rengekî tirsonekî li Ranyayê êriş pêk anî û di encamê de rojnamevan Azîz Koyluoglû şehîd bû û wiha got: “Helbet pênûsa hevrê Azîz li erdê namîne, deng û gotina wî dê hîn xurttir bibe.”
Koordînasyona Giştî ya YRD’ê bi daxuyaniyekê ragihand ku Rojnamevan Azîz Koyluoglû 27’ê Çileyê di êrişa dewleta Tirk a dagirker a li Ranyayê pêkaniyî de şehîd bû.
YRD’ê da xuyakirin ku dagirkeriya Tirk xwest bi vê êriş dengê heqîqetê bide sekinandin û wiha got: “Ên ku ji pênûs û gotina hevrê Azîz rehetsiz dibûn, bi êrişekî tirsonek berê xwe dan wî, bi vî awayî xwestin dengê heqîqetê bidin sekinandin. Lê divê bizanibin ku hevrê Azîz jî wekî yên berî xwe berdêl dayîn berçav giriye û ketiye vê karwanê, di her kêliya xwe de wek neferekî doza azadiyê tevgeriyaye û vê alê bi awayek xurt dewrî me kiriye. Sekna hevrê Azîz li hemberî dijmin serî natewîne. Ev sekna wî sekn û helwesta her hevalê wî yê ciwan e. Vê êrişê paşde gav bi hevrê Azîz neda avêtin û wê paşde gav bi me jî nede avêtin. Berovajî wê azweriya têkoşîna me mezintir bike.”
YRD’ê da diyarkirin ku şehîd Azîz li her deverê xebat daye meşandin û wiha got: “Hevre Azîz ji Hewlêrê heta Silemaniyê û Kerkûkê, ji wir heta Mexmûrê û her dera başûrê Kurdistanê xebat meşand. Dîsa ji Dêrika Rojavayê Kurdistanê heta Efrînê li her cihê di her astê de xebatên weşanê ya ragihandinê meşand. Hevrê Azîz tenê nenivîsand, bi qasî vê axivî û ji bo dijminê qirker-dagirker teşhîr bike hemû derfetên di destê xwe de bi kar anî. Bêguman wê pênûsa hevrê Azîz li erdê nemîne, deng û gotina wî hîn geştir derkeve. Nirxên têkoşînê yên ku hevrê Azîz hiştiye, wê ji aliyê her kadroyê ragihandinê ve were mezinkirin û wê bibe haveyna pêşeroja azad a gelê me.”
YRD’ê di dawiya daxuyaniya xwe de soza bilindkirina têkoşînê da û wiha qedand: “Dijminê faşîst çi dike bila bike, serî li kîjan rêbazên dermirovî bide jî wê encam negire. Hêza wî têra neke ku rastiyê di tarîtiyê de bihêle. Çapemeniya Azad, mîna duh wê îro jî wek Azîz, ji Azîzan û şehîdên ku vê kevneşopiyê afirandine hîn zêdetir tiştan fêr bibe û wê bi hîn zêdetir karkirinê re vê kevneşopiyê bi serkeftinê tacîdar bike. Em soza xwe dûbare dikin ku em ê têkoşîna xwe bilindtir bikin.”
