Ayşa Silêman/Qamişlo
Îro Rêveberiya Xweseriya Demokratîk a kantona Cizîrê ji bo rewşa sefereberî ya giştî ya ku Rêveberiya Xweser a Bakur û Rojhilatê Sûrî ji ber êrişên dagirkeriya Tirkiyê li ser herêmê ragihandî li bajarê Qamişlo daxuyaniyek da.
Rêveberiya Xweseriya Demokratîk a kantona Cizîrê û bi amadebûna hemû saziyên di bin sîwana Rêveberiya Xweser de û bidehan endamên rêxistinên jinan, di derbarî tevlîbûna berpirs û endamên Rêveberiya Xweser di nava QSD’ê de li hemberî rewşa seferberî ya giştî ya ku Rêveberiya Xweser a Bakur û Rojhilatê Sûrî ji ber êrişên dagirkeriya Tirkiyê li ser herêmê ragihandiye li çerxereya Şehîdan li bajarê Qamişlo daxuyaniyek dan.
Di destpêka daxuyaniyê de bal hat kişandin li ser berxwedana dîrokî ya ku ji du mehan ve li bendava Tişrîn û pira Qereqozaqê berdewam dike. Her wiha berxwedana bi heybet a ciwanên kurd, ereb, asûr, suryan û tevayî gelê me ên ku ji pergala Neteweya Demokratîk bawer dikin û roj bi roj di vê bîr û baweriyê de ne û li hemberî dewleta Tirk a dagirker li ber xwe didin. Îro ev pêvajo bi pêşengiya QSD’ê tê meşandin. Hemû gelên cîhanê, gelê herêmî û hêzên li Rojhilata Navîn divê helwesta xwe diyar bikin.
Di berdewamiya daxuyaniyê de bal hat kişandin li ser gelên Bakur û Rojhilatê Sûriyeyê ku ev du meh in li bendava Tişrînê di nav berxwedaneke herî bi rûmet de ne û wiha gotin: ” Ev berxwedan niha meheke xwe tijî dike, vîna mirovahiyê li ser Bendava Şehîdan tê temsîlkirin û roj bi roj gelên Bakur û Rojhilatê Sûriyeyê bi awayekî dorveger berê xwe didin bendavê û tevlî nobeta li wir dibin. Li hember êrişên dewleta Tirk a dagirker û çeteyên wê ku yekser mirovên sivîl dikin hedef, hêrsa gel zêdetir dibe. Ji xwe tevahî welat di nava şer û gengeşeyên pir mezin de ne û rojane bi çavên xwe dibînin ku dewleta Tirk çawa li hemberî jin, zarok û tevahî civakê şerekî tundrew pêk tîne. Di encama şerê heyî yê du mehan de gelek windahî hene û ji niha û şûn ve jî dibe ku windahî çêbibin. Lê ya girîng ew e, em di berxwedan û têkoşîna xwe de bi israr bin û bigihînin serkeftinê.”
Di dawiya daxuyaniyê de wiha hat gotin:” Em tevahî gelên Sûriyeyê yên têkoşer û azadîxwaz silav dikin û berxwedana wan pîroz dikin. Bi taybetî em gelên xwe yên çalakvan ên Bakur û Rojhilatê Sûriyeyê bi hurmet silav dikin û çalakiyên wan pîroz dikin. Ji malbatên şehîdan re dibêjin serê we sax be û ji birîndaran re şîfaya lezgîn dixwazin. Em wek Rêveberiya Xweser a kantona Cizîre bi hemû partî û saziyên xwe ve tevlî seferberiya gîştî dibin û diçin nav refên QSD’ê de.”
