Hemza Sêvo/ Qamişlo
Li dijî Komploya Navneteweyî ya li ser Rêber Apo, Yekîtiya Jinên Ciwan bi tevlîbûna jinên hemû pêkhateyên kantona Cizîrê li Qamişlo meşeke xweser li dar xistin.
Bi durşmeya “Bi têkoşîna jinên ciwan em ê dîwarên Îmraliyê hilweşînin û bi Rêber Apo re azad bijîn.” li dijî Komploya 15’ê Sibata 1999’an, ji hêla Yekîtiya Jinên Ciwan ve meşek li Qamişlo hat lidarxistin.
Meşa girseyî bi pêşengtiya jinan û dayikên şehîdan ji Navenda Çand û Hunerê ya Mihemed Şêxo dest pê kir.
Di berdewamiya meşê de stranên şoreşgerî û silogana “Azadiya fîzîkî ji bo Rêberê Netewî, Bijî Rêber Apo, Têk biçe Komploya Navnetewî, Bijî berxwedana Bendava Tişrînê.” dihatin gotin. Herwiha tilîliyên jinên azad û tiliyên azad li jora asîmanê Qamişlo dihatin bihîstin û dîtin.
Meşa girseyî li pêşiya Şaredariya Gel a bajarê Qamişlo veguherî mîtîng li wir jî hemû kesên amade bi rêzdarî şehîdên azadiyê bi bîr xistin.
Herwiha bi navê Yekîtiya Jinên Ciwan a Bakur û Rojhilatê Sûriyê, Betûl Semîr bal kişand li ser komploya li dijî Rêber
Apo û wiha got: “Îro em jinên kantona Cizîrê bi giştî derketine qadan, bi deng, doz û fikrekî hevbeş û komployê şermezar dikin. Em vê komployê bi çi sedeman û tu rengî qebûl nakin ku Rêberê Mirovahiyê di nava çar dîwaran de dîlgirtî be. Dewleta Tirk bi riya komployê siyaseteke qirêj dide meşandin. Îro jî li Bendava Tişrînê li hemberî kiriyarên dagirkeriya Tirk jinan hedef digire, lê li hemberî vê yekê berxwedaniyeke bêhempa ji hêla QSD, YPG, YPJ’ê û gelên me ve tê nîşanandan. Em weke jin her tim dibêjin ku em ê ne hedefeke hêsan bin ji bo dagirkeriyê, em ê her û her bi fikrê rêberê xwe têkoşînê bidomînin û ji bo azadiya wî ya fîzîkî li ber xwe bidin.”
Mîtîng bi siloganên germ û tilîliyên jinan bi dawî bû.
