Ayşa Silêman/ Qamişlo
Îro Insiyatîfa Gelê Kurd a Serbixwe ji bo daxwaza bidawîkirina êrişên dewleta Tirk a dagirker û çeteyên wê çalakiyeke protestoyî li pêş avahiya Nivîsgeha NYˋyê ya li bajarê Qamişloyê li dar xist.
Insiyatîfa Gelê Kurd a Serbixwe ji bo daxwaza bidawîkirina êrişên dewleta Tirk a dagirker û çeteyên wê li ser binesaziyan û sivîlên li herêmên Sûriyeyê û bidawîkirina dagirkeriyê çalakiyeke protestoyî li pêş avahiya Nivîsgeha NYˋyê ya li taxa Siyahî ya bajarê Qamişlo li dar xist.
Çalakî bi xuleyek bêdeng dest pê kir, paşê bi navê Insiyatîfa Gelê Kurd a Serbixwe û civaka sivîl daxuyanî bi devokî hat xwendin.
Di destpêka daxuyaniyê de bal hat kişandin li ser sûcên dijmirovî yên ku li ser sivîlan tê kirin û wiha got: ” Em wek insiyatîfa Gelê Kurd a Serbixwe gelek xemgîn û dil giranin li ser van êrişên ku dewleta Tirk û çeteyên wê li ser herêmê dikin. Em dibêjin ku îro piştî rûxandina rêjîmê dem ew e ku gelê Kurdistanê mafê çarenûsê bidest bixin. Ji ber ku desthilatdariya Baas gelek wêranî û xirabî kir, bi melyona gel koçber kirin. Lê wek tê dîtin ku piştî Îran ji axa sûriyê derket û rêjîm hat rûxandin, dagirkeriya Tirk dixwaze serweriya xwe pêkbîne û dixwaze xaka me dagirbike. Di heman demê de dixwaze guhertinên demografîk çêbike û ev yek nayê qebûl kirin.”
Di berdewamiya daxuyaniyê de wiha hat gotin:”Banga me ji bo hemû Saziyên Navdewletî û Encûmana Asayîşa Navdewletî ew e ku rê li pêşiya destwerdanên dagikeriya Tirk ê ku di xaka Sûriyê de dike bigre. Ji ber ku ev yek dijmiroviye û ne ji mafê wê ye û pêwîste gel kêf û şahiya xwe bi rûxandina rêjîma Baas berdewam bikin. Her wiha divê gelê Sûriyê jî jiyaneke aram bij û Sûriyeke nenavendî û fedral were avakirin.”
Herwiha heman nameya ku bi devokê hatiye gotin bi zimanê ingilîzî radestî NY’î hate kirin.
